PF वर व्याजदर वाढला की कमी झाला? पाहा सरकारने काय घेतला निर्णय?

ईपीएफओने विद्यामान वर्षात २ मार्च २०२६ रोजी २०२५-२६ आर्थिक वर्षासाठी कर्मचाऱ्यांच्या भविष्य निर्वाह निधी (ईपीएफ) ठेवींवरील ८.२५ टक्के व्याजदर कायम ठेवण्याचा निर्णय घेतला होता. कर्मचारी भविष्य निर्वाह निधीवर ८.२५ टक्के व्याज देण्याची शिफारस मंजुरीसाठी केंद्रीय अर्थ मंत्रालयाच्या मान्यतेसाठी पाठवण्यात आली होती. कर्मचारी भविष्य निर्वाह निधी सदस्यांच्या खात्यात विद्यमान महिन्यातच ही व्याजाची रक्कम जमा होण्याची शक्यता आहे, अशी माहिती सूत्राने गुरुवारी दिली.

केंद्रीय कामगार आणि रोजगारमंत्री मनसुख मांडवीय यांच्या अध्यक्षतेखाली २ मार्च २०२६ रोजी नवी दिल्ली येथे झालेल्या ईपीएफओच्या केंद्रीय विश्वस्त मंडळाच्या बैठकीत ८.२५ टक्के व्याजदराची शिफारस करण्यात आली होती. सलग तिसऱ्या वर्षी हाच दर कायम ठेवण्यात आला आहे.

याआधी व्याजदर कसा?

आर्थिक वर्ष २०२४-२५ या आर्थिक वर्षासाठी ८.२५ टक्के व्याजदर कायम ठेवला होता. तर फेब्रुवारी २०२४ मध्ये, ईपीएफओने २०२३-२४ साठी व्याजदर किरकोळ वाढवून ८.२५ टक्के केला होता. त्याआधीच्या वर्षात म्हणजेच मार्च २०२२-२३ (एप्रिल २०२२ ते मार्च २०२३) मध्ये हा व्याजदर ८.१५ टक्के असा वाढविण्यात आला होता. तर त्याआधीच्या वर्षात (२०२१-२२) तो ८.५ टक्क्यांवरून त्यात थेट ०.४० टक्क्यांची (४० आधारबिंदूची) कपात करत तो ८.१० टक्के असा चार दशकांतील नीचांकी पातळीवर आणला होता. वर्ष २०२०-२१ मधील ८.१० टक्के हा दर १९७७-७८ नंतरचा सर्वात कमी दर होता. याआधी वर्ष १९७७-७८ मध्ये कर्मचारी भविष्य निर्वाह निधीवरील व्याजदर ८ टक्क्यांपर्यंत खाली आणला होता.

ईपीएफओने २०१६-१७ मध्ये सदस्यांना ८.६५ टक्के आणि २०१७-१८ मध्ये ८.५५ टक्के व्याजदर दिला होता. वर्ष २०१५-१६ मध्ये व्याजदर थोडा अधिक, म्हणजेच ८.८ टक्के होता. निवृत्ती निधी संस्थेने २०१३-१४ आणि २०१४-१५ या दोन्ही वर्षांत ८.७५ टक्के व्याजदर दिला होता, जो २०१२-१३ मधील ८.५ टक्के दरापेक्षा अधिक होता. तर वर्ष २०११-१२ मध्ये व्याजदर ८.२५ टक्के होता.