Silver Price: चांदीच्या किमतीचा रेकॉर्ड; खरेदी करावी की विकावी, तज्ज्ञांचे म्हणणे काय?

अध्यक्ष डोनाल्ड ट्रम्प यांच्या ग्रीनलँड ताब्यात घेण्याच्या सततच्या धमक्यांमुळे अमेरिका आणि युरोपियन युनियनमधील तणाव वाढल्याने, चांदीच्या किमतींनी आज नवीन विक्रमी उच्चांक गाठला. मार्च महिन्यातील चांदीच्या फ्युचर्समध्ये सुमारे ३ टक्क्यांनी वाढ झाली आणि त्यांनी प्रति किलोग्राम ३,१८,७२९ रुपयांचा नवीन ऐतिहासिक उच्चांक गाठला. दरम्यान, मे आणि जुलै मुदतीच्या फ्युचर्स करारांमध्ये ३ टक्क्यांहून अधिक वाढ झाली आणि त्यांनी अनुक्रमे प्रति किलोग्राम ३,२८,८५४ रुपये आणि ३,३५,८८५ रुपयांचे नवीन विक्रमी उच्चांक गाठले आहेत.

चांदीमध्ये उल्लेखनीय वाढ सुरू असून, चार दशकांमधील सर्वोत्तम तेजीला तिने गाठले आहे. चालू आर्थिक वर्षातील सर्वोत्तम कामगिरी करणारा मौल्यवान धातू म्हणून तिने स्थान मिळवले आहे. तर स्पॉट चांदीने ९४.७२ डॉलरचा नवीन विक्रमी उच्चांक गाठला.

चांदीच्या किमती का वाढत आहेत?

ट्रम्प यांनी ग्रीनलँड ताब्यात घेण्याच्या आपल्या प्रयत्नांचा भाग म्हणून आठ युरोपीय देशांवर नवीन शुल्क लादल्यामुळे अलीकडे भू-राजकीय तणाव वाढला आहे. ट्रम्प यांनी १ फेब्रुवारीपासून युरोपीय देशांकडून होणाऱ्या आयातीवर १० टक्के शुल्क लावले आहे. हे शुल्क १ जून रोजी २५ टक्क्यांपर्यंत वाढेल आणि जोपर्यंत अमेरिका ग्रीनलँड ताब्यात घेण्यासाठी करार करत नाही, तोपर्यंत ते लागू राहील.

सोमवारी ट्रम्प यांनी लष्करी बळाचा देखील वापर करण्याची शक्यता नाकारली नाही. युरोपीय नेत्यांनी ट्रम्प यांच्या मागण्या फेटाळून लावल्या आहेत, तर काही देशांनी अमेरिकेविरुद्ध प्रतिशोधात्मक आर्थिक उपाययोजनांचा इशाराही दिला आहे. आंतरराष्ट्रीय घडामोडींबाबत ट्रम्प यांचा ‘विघटनकारी’ धोरणात्मक दृष्टिकोन मौल्यवान धातूंसाठी खूपच अनुकूल आहे. यामुळे सोने आणि चांदी नवीन उच्चांक गाठत आहेत, असे केसीएम ट्रेडचे मुख्य बाजार विश्लेषक टिम वॉटरर यांनी सांगितले.

चांदीचे ईटीएफ

ग्रो सिल्व्हर ईटीएफ ७ टक्क्यांहून अधिक वाढून प्रति युनिट ३०८.३७ रुपयांच्या नवीन ५२-आठवड्यांच्या उच्चांकावर पोहोचले आहे. टाटा सिल्व्हर ईटीएफ, मोतीलाल ओसवाल सिल्व्हर ईटीएफ, आदित्य बिर्ला सिल्व्हर ईटीएफ, एडलवाईस सिल्व्हर ईटीएफ आणि मिराए ॲसेट सिल्व्वर ईटीएफ प्रत्येकी सुमारे ५ टक्क्यांनी वाढून विक्रमी उच्चांकावर पोहोचले आहेत.

यूटीआय सिल्व्हर ईटीएफ, डीएसपी सिल्व्हर ईटीएफ, ॲक्सिस सिल्व्हर ईटीएफ, एचडीएफसी सिल्व्हर ईटीएफ, झिरोधा सिल्व्हर ईटीएफ आणि कोटक सिल्व्हर ईटीएफमध्ये ४ टक्क्यांहून अधिक वाढ झाली, तर आयसीआयसीआय प्रू सिल्व्हर ईटीएफ, निप्पॉन सिल्व्हर ईटीएफ (सिल्व्हरबीज) आणि एसबीआय सिल्व्हर ईटीएफमध्ये प्रत्येकी जवळपास ४ टक्क्यांनी वाढ झाली.

या पातळीवर चांदी ईटीएफ खरेदी करावेत का?

व्हीटी मार्केट्सचे ग्लोबल स्ट्रॅटेजी ऑपरेशन्स लीड, रॉस मॅक्सवेल म्हणाले की, नवीन गुंतवणुकीचा विचार करणाऱ्यांसाठी सध्या मुख्य धोका मूल्यांकन आणि बाजारातील भावना हा आहे. चांदी सोन्यापेक्षा अधिक अस्थिर बनली आहे . याआधी तीव्र तेजीनंतर तितकीच तीव्र घसरण चांदीमध्ये अनेकदा दिसून आली आहे. सध्याच्या उच्च पातळीवर गुंतवणूक केल्यास, जर किमती स्थिर झाल्या किंवा त्यात तीव्र घसरण झाली, तर नवीन गुंतवणूकदारांना नजीकच्या काळात नुकसानीचा सामना करावा लागू शकतो. ज्यांना तरीही गुंतवणूक करायची आहे, त्यांच्यासाठी एक चांगला मार्ग म्हणजे ‘डॉलर कॉस्ट ॲव्हरेजिंग’ धोरण वापरणे. यामध्ये लहान, टप्प्याटप्प्याने गुंतवणूक केली जाते, ज्यामुळे गुंतवणुकीची सरासरी किंमत कमी होते आणि वेळेनुसार येणारा धोका कमी होतो.

चांदी विकावी का?

चांदीमध्ये हेज म्हणून किंवा अल्प-मुदतीत नफ्यासाठी गुंतवणूक केली असेल, तर या पातळीवर किमान काही प्रमाणात नफावसुली करणे शहाणपणाचे आहे. नफा सुरक्षित करणे आणि लक्ष्यित मालमत्ता वाटपानुसार पोर्टफोलिओचे पुनर्संतुलन करण्याची ही योग्य वेळ आहे. मात्र औद्योगिक मागणी आणि मर्यादित पुरवठा यांसारख्या संरचनात्मक घटकांवर विश्वास असलेले दीर्घकालीन दृष्टिकोन असलेले गुंतवणूकदार चांदीमध्ये गुंतवणूक कायम ठेवण्याचा पर्याय निवडू शकतात,. मोठ्या नवीन गुंतवणुकीसाठी ही आदर्श किंमत नाही आणि सध्याच्या गुंतवणूकदारांसाठी पूर्णपणे बाहेर पडण्याऐवजी अंशतः नफा वसुली करणे हे एक निश्चित तर्कसंगत जोखीम व्यवस्थापन ठरेल.