पडत्या रुपयाच्या पार्श्वभूमीवर रिझर्व्ह बँकेचे आज पतधोरण

अमेरिकेशी व्यापार कराराबाबत स्पष्टतेअभावी ढासळत असलेल्या रुपयाने निर्माण केलेले आव्हान पाहता, रिझर्व्ह बँकेकडून सलग तिसऱ्यांदा रेपो दराबाबत यथास्थिती कायम राखली जाण्याची शक्यता आहे. गव्हर्नर संजय मल्होत्रा यांच्या नेतृत्वाखाली बुधवारपासून सुरू झालेल्या तीन दिवसाच्या पतधोरण समितीच्या बैठकीतील निष्कर्ष शुक्रवारी सकाळी जाहीर केले जातील.

महागाईतील दिलासादायी घट, सकल देशांतर्गत उत्पादनात (जीडीपी) दुसऱ्या तिमाहीतील ८.२ टक्क्यांची सरस वाढ, त्या उलट डॉलरच्या तुलनेत रुपयाने गाठलेली नव्वदी आणि चालू भू-राजकीय तणावाच्या पार्श्वभूमीवर ही बैठक होत आहे. किरकोळ महागाई दरात घट होत असताना, फेब्रुवारीपासून रिझर्व्ह बँकेने तीन टप्प्यात रेपो दरात १०० आधार बिदूंची (१ टक्का) घट केली आहे. विकासदर मजबूत असला तरी, किरकोळ महागाईत लक्षणीय घट झाल्यामुळे रेपो दरात कपात करण्यासाठी वाव आहे, असे तज्ज्ञांनी निरीक्षण नोंदविले आहे.

गेल्या महिन्यात रिझर्व्ह बँकेच्या गव्हर्नरांनीही व्याजदरात आणखी कपात करण्याची शक्यता असल्याचे म्हटले होते. जीएसटी दर कपातीसारख्या सुधारणा आणि जीडीपीतील दमदार तिमाही वाढ यामुळे कपातीच्या शक्यतेबद्दल खात्री व्यक्त केली जात असताना, विक्रमी व्यापार तूट आणि भरील डॉलरच्या बहिर्गमनामुळे ढासळलेले रुपयाचे मूल्य पाहता, रिझर्व्ह बँकेच्या पवित्र्याकडे विश्लेषकांचे विशेष लक्ष आहे. आगामी काळात किरकोळ महागाई ४ टक्क्यांखाली राहील अशी आशा आहे. पहिल्या सहामाहीतील अपेक्षेपेक्षा चांगली आकडेवारी पाहता, रिझर्व्ह बँकेकडून जीडीपी वाढीचा अंदाज सुधारला जाणे अपेक्षित आहे. ऑक्टोबरच्या सुरुवातीला, रिझर्व्ह बँकेने चालू आर्थिक वर्षासाठी जीडीपीचा अंदाज ६.५ टक्क्यांवरून ६.८ टक्क्यांपर्यंत वाढवला होता.