टाटा मोटर्सच्या वाणिज्य वाहन कंपनीचे २८ टक्के अधिमूल्यासह पदार्पण

टाटा मोटर्सच्या वाणिज्य आणि प्रवासी वाहन कंपन्यांमध्ये विलगीकरण १ ऑक्टोबर २०२५ पासून लागू झाले आहे.

टाटा मोटर्सच्या वाणिज्य वाहन कंपनीचे २८ टक्के अधिमूल्यासह पदार्पण (प्रतिकात्मक छायाचित्र)

मुंबई: वाहन निर्मिती क्षेत्रातील प्रमुख कंपनी असलेल्या टाटा मोटर्सच्या दोन स्वतंत्र कंपन्यांतील विलगीकरणानंतर, वाणिज्य क्षेत्रातील कंपनीच्या समभागांची बुधवारी सूचिबद्धता झाली आणि पदार्पणाच्या सत्रात या समभागांनी २८ टक्के अधिमूल्य मिळविले.

टाटा मोटर्सच्या वाणिज्य आणि प्रवासी वाहन कंपन्यांमध्ये विलगीकरण १ ऑक्टोबर २०२५ पासून लागू झाले आहे. दोन्ही कंपन्यांचे विलगीकरण झाल्यांनतर भांडवली बाजारात टाटा मोटर्सची प्रवासी आणि वाणिज्य वाहन निर्मिती करणाऱ्या कंपन्यांचे समभाग सूचिबद्धता प्रस्तावित करण्यात आली. त्यापैकी टीएमएल कमर्शियल व्हेइकल्स अर्थात वाणिज्य वाहने व्यवसायातील कंपनीची सूचिबद्धता बुधवारी झाली. प्रवासी वाहने ज्यामध्ये विद्युत शक्तीवर चालणारी म्हणजेच ईव्ही आणि जग्वार लँड रोव्हर व्यवसायांचा समावेश आहे, त्या कंपनीचे नाव टाटा मोटर्स पॅसेंजर व्हेईकल्स असून या कंपनीच्या समभागांची सूचिबद्धता सरलेल्या १४ ऑक्टोबरला झाली आहे.

टाटा मोटर्स कमर्शियल व्हेइकल्सच्या समभागाने ३३५ रुपयांवर बाजारात पदार्पण केले. त्याने २८.४८ टक्के वाढीसह व्यवहार सुरू केले. समभाग भांडवली बाजारात सूचिबद्ध झाल्यांनतर नवीन कंपनीचे बाजारभांडवल १,२२,३४५ लाख कोटी रुपयांवर पोहोचले आहे.

हेही वाचा

Bank Credit Growth : कर्जमागणीत वाढीच्या अंदाजासह, ‘एनपीए’च्या प्रमाणाबाबतही बँकांना धोक्याचा इशारा

सत्राअखेर टाटा मोटर्सचा (वाणिज्य शाखा) समभाग २५.५६ टक्के म्हणजेच ६९.२५ रुपये वाढीसह ३३० रुपयांवर बंद झाला. तर टाटा मोटर्स पॅसेंजर व्हेईकल या प्रवासी वाहन कंपनीचा समभाग बुधवारच्या सत्रात १.३० टक्क्यांच्या घसरणीसह ४०२.३० रुपयांवर बंद झाला. सध्याच्या समभागांच्या बाजारभावानुसार, कंपनीचे १,४८,१५० कोटी रुपयांचे बाजार भांडवल आहे. म्हणजे दोन्ही कंपन्यांचे एकत्रित बाजार भांडवल २.७० लाख कोटी रुपयांपेक्षा अधिक झाले आहे.