पुणे : ऊर्जा व पर्यावरणविषयक उत्पादनांचा पुरवठा करणाऱ्या थरमॅक्स कंपनीने सेरेस पॉवर होल्डिंग्ज पीएलसीची उपकंपनी सेरेस पॉवर लिमिटेड या पर्यावरणपूरक ऊर्जा तंत्रज्ञानाच्या विकासाच्या क्षेत्रातील कंपनीशी धोरणात्मक सहयोगाची घोषणा गुरुवारी केली. या भागीदारीमुळे पर्यावरणपूरक हायड्रोजनची किफायतशीर निर्मिती शक्य होणार आहे.
हेही वाचा >>> ई-वाहनांची वार्षिक विक्री ३० ते ४० लाखांवर पोहोचण्याचा अंदाज
सेरेसच्या प्रगत सॉलिड ऑक्साइड इलेक्ट्रोलिसिस (एसओईसी) तंत्रज्ञानाच्या माध्यमातून थरमॅक्ससाठी स्टॅक ॲरे मॉडेल्स (एसएएम) उत्पादित करण्याचा जागतिक परवाना करार या दोन कंपन्यांमध्ये झाला आहे. थरमॅक्स एसएएम बॅलन्स ऑफ मोड्युल (एसबीएम) आणि मल्टि-मेगावॉट एसओईसी इलेक्ट्रोलिसिस मोड्युलही विकसित करणार आहे. तसेच त्याचे व्यावसायिकीकरण करून विक्रीही करणार आहे. या भागीदारीमुळे भारतात व जगभरात एसओईसी तंत्रज्ञानाच्या उपयोगास वेग देण्याच्या दिशेने महत्त्वपूर्ण पाऊल टाकले गेले आहे.
हेही वाचा >>> पीएनजी ज्वेलर्सच्या ‘आयपीओ’त शेवटच्या दिवशी ५९.४१ पट भरणा
सध्याच्या निम्न-तापमान इलेक्ट्रोलिसिस तंत्रज्ञानाच्या तुलनेत २५ टक्क्यांपर्यंत अधिक कार्यक्षम प्रणाली निर्माण करण्यात येणार आहे. औद्योगिक प्रक्रियांमधील उष्णतेतून तयार होणाऱ्या वाफेचे प्रभावीरीत्या उपयोजन करून हायड्रोजननिर्मितीच्या क्षेत्रात क्रांती घडवून आणण्याचे उद्दिष्ट या सहयोगापुढे आहे. अमोनिया/खते, पोलाद, शुद्धीकरण प्रकल्प व रसायननिर्मिती अशा कार्बन उत्सर्जन कमी करणे कठीण असलेल्या उद्योग क्षेत्रांना कार्बनमुक्तीच्या दिशेने जाण्यासाठी हे एक उपयुक्त उत्पादन ठरेलणार आहे, असे थरमॅक्सचे व्यवस्थापकीय संचालक व मुख्य कार्यकारी अधिकारी आशीष भंडारी यांनी सांगितले.
