एचडीएफसी बँकेने जून तिमाहीत कमावला १९,०६० कोटींचा नफा

महसूल आणि उत्पन्नाची आकडेवारी

बँकेचे एकूण उत्पन्न  ९२,१८४ कोटी रुपयांवर आले आहे. बँकेच्या व्याज उत्पन्नात वाढ झाली असून ते ७७,४७० कोटी रुपयांवरून ७९,३६३ कोटी रुपये झाले आहे. बँकेचे निव्वळ व्याज उत्पन्न ७ टक्क्यांनी वाढून ३३,५३० कोटी रुपये झाले आहे (गेल्या वर्षी हे ३१,४४० कोटी रुपये होते). तर बँकेचा परिचालन नफा गेल्या वर्षीच्या ३५,७३४ कोटी रुपयांच्या तुलनेत घसरून २८,१६९ कोटी रुपयांवर आला आहे.  एचडीएफसी बँक ग्रुपचा एकूण नफा १८ टक्क्यांनी वाढून १९,२४५ कोटी रुपये झाला आहे, जो गेल्या वर्षी १६,२५८ कोटी रुपये होता.

मालमत्तेची गुणवत्ता सुधारली

बँकेसाठी सर्वात दिलासादायक बाब म्हणजे तिच्या मालमत्तेच्या गुणवत्तेत लक्षणीय सुधारणा झाली आहे. बँकेचा ढोबळ अनुत्पादित मालमत्तेचा आलेख १.४ टक्क्यांवरून घसरून १.१७ टक्के झाला आहे. निव्वळ एनपीए देखील ०.४७ टक्क्यांवरून कमी होऊन ०.४१ टक्के झाला आहे. एनपीएमध्ये सुधारणा झाल्यामुळे संभाव्य बुडीत कर्जासाठी करण्यात येणाऱ्या तरतुदींमध्ये मोठी घसरण झाली आहे. पहिल्या तिमाहीत ही तरतूद १४,४४२ कोटी रुपयांवरून थेट ३,०६० कोटी रुपयांवर आली आहे.

नव्या अध्यक्षांचे स्वागत आणि व्यवस्थापकीय बदल

एचडीएफसी बँकेचे व्यवस्थापकीय संचालक  आणि मुख्य कार्यकारी अधिकारी शशिधर जगदीशन यांनी बँकेचे नवे अर्धवेळ अध्यक्ष  राजीव कुमार  यांचे स्वागत केले. माजी मुख्य निवडणूक आयुक्त आणि वित्त सचिव राहिलेले राजीव कुमार यांच्या नियुक्तीमुळे बँकेत स्थिरतेचे वातावरण निर्माण झाल्याचे जगदीशन यांनी सांगितले. अतनु चक्रवर्ती यांनी अचानक दिलेल्या राजीनाम्यानंतर राजीव कुमार यांची या पदावर नियुक्ती करण्यात आली आहे. चक्रवर्ती यांनी आपल्या राजीनामा पत्रात “बँकेतील काही घडामोडी आणि पद्धती माझ्या वैयक्तिक मूल्यांशी सुसंगत नव्हत्या,” असा आरोप केला होता, ज्यामुळे कॉर्पोरेट गव्हर्नन्सबाबत चिंता निर्माण झाली होती आणि शेअर बाजारात बँकेच्या शेअर्स घसरले होते. राजीव कुमार यांनी यापूर्वी वित्त सेवा विभागात कार्यरत असताना ३.३८ लाख शेल कंपन्यांची खाती गोठवून काळ्या पैशाच्या नेटवर्कला मोठा धक्का दिला होता.

भविष्यातील वाटचाल

सीईओ शशिधर जगदीशन यांच्या पुनर्नियुक्तीच्या प्रक्रियेवर बोलताना बँकेचे डेप्युटी एमडी कैझाद भरुचा यांनी स्पष्ट केले की, नवीन अध्यक्ष नुकतेच रुजू झाले असून, गव्हर्नन्स, नॉमिनेशन अँड रेम्युनेरेशन कमिटी यावर योग्य वेळी निर्णय घेईल. जगदीशन यांचा सध्याचा ३ वर्षांचा कार्यकाळ २६ ऑक्टोबर २०२६ रोजी संपत आहे. बँकेच्या भविष्यातील वाढीबद्दल बोलताना जगदीशन यांनी सांगितले की, “आम्ही आता गती वाढवण्याच्या उंबरठ्यावर आहोत आणि देशातील व्यावसायिक वातावरण अत्यंत निरोगी आहे.”