मुंबई : वित्तीय क्षेत्रातील आघाडीच्या ‘एचडीएफसी समूहा’साठी चालू आर्थिक वर्षाची पहिली तिमाही (Q1) अत्यंत फायदेशीर ठरली आहे. समूहातील विमा, म्युच्युअल फंड आणि एनबीएफसी (NBFC) क्षेत्रातील तिन्ही प्रमुख कंपन्यांनी बुधवारी त्यांचे तिमाही निकाल जाहीर केले असून, तिन्हींच्या नफ्यात मोठी वाढ नोंदवली गेली आहे.
१) एचडीएफसी लाइफच्या नफ्यात १२ टक्क्यांची वाढ
प्रीमियम संकलनात झालेल्या वाढीमुळे ‘एचडीएफसी लाइफ इन्शुरन्स कंपनी’चा निव्वळ नफा ३० जून २०२६ रोजी संपलेल्या तिमाहीत १२ टक्क्यांनी वाढून ६११ कोटी रुपयांवर पोहोचला आहे. मागील वर्षाच्या याच कालावधीत कंपनीला ५४६ कोटी रुपयांचा नफा झाला होता.
निव्वळ प्रीमियम उत्पन्न: गेल्या वर्षीच्या १४,४६६ कोटी रुपयांवरून वाढून १६,५४८ कोटी रुपये झाले आहे.
व्यवस्थापनाखालील मालमत्ता : १३ टक्क्यांची मजबूत वाढ नोंदवत ४ लाख कोटी रुपयांचा टप्पा ओलांडला आहे.
नवीन व्यवसाय मूल्य: ९ टक्क्यांनी वाढून ८७९ कोटी रुपये झाले आहे.
२) एचडीबी फायनान्शियल सर्व्हिसेसला ७८५ कोटींचा ऐतिहासिक नफा
एचडीएफसी बँकेची उपकंपनी असलेल्या या ‘एनबीएफसी’ने आतापर्यंतचा सर्वोच्च त्रैमासिक नफा नोंदवला आहे. मुख्य उत्पन्नातील (Core Income) वाढीमुळे कंपनीचा निव्वळ नफा ३८.३ टक्क्यांनी झेप घेत ७८५ कोटी रुपयांवर पोहोचला आहे, जो गेल्या वर्षी ५६८ कोटी रुपये होता.
निव्वळ व्याज उत्पन्न (NII): २० टक्क्यांनी वाढून २,५०९ कोटी रुपये झाले आहे.
मालमत्ता गुणवत्ता (Asset Quality): कंपनीचा ग्रॉस एनपीए (Gross NPA) २.५६ टक्क्यांवरून कमी होऊन २.३४ टक्क्यांवर आला आहे, तर नेट एनपीए देखील १.०४ टक्क्यांपर्यंत खाली आला आहे.
एकूण कर्ज पोर्टफोलिओ: ११.४ टक्क्यांनी वाढून १.२२ लाख कोटी रुपये झाला आहे.
३) एचडीसी एएमसीचा नफा ८३७ कोटींवर, ५४ रुपयांचा लाभांश
मजबूत परिचालन महसुलाच्या जोरावर ‘एचडीएफसी ॲसेटॅमनेजमेंट कंपनी’च्या एकत्रित कर-पश्चात नफ्यात (PAT) १२ टक्क्यांची वाढ झाली असून तो ८३७.१३ कोटी रुपयांवर पोहोचला आहे. मागील आर्थिक वर्षाच्या याच तिमाहीत हा नफा ७४७.५५ कोटी रुपये होता.
परिचालन महसूल: १३.६ टक्क्यांनी वाढून १,०९९.७२ कोटी रुपये झाला आहे.
AUM (म्युच्युअल फंड मालमत्ता): ८.३ लाख कोटी रुपयांवरून वाढून ९.३५ लाख कोटी रुपये झाली आहे.
लाभांश (Dividend): कंपनीने आपल्या भागधारकांसाठी प्रति इक्विटी शेअर ५४ रुपयांचा अंतिम लाभांश मंजूर केला आहे.
या दमदार निकालांनंतर शेअर बाजारातही या कंपन्यांच्या शेअर्समध्ये तेजी पाहायला मिळाली. बीएसईवर एचडीएफसी एएमसीचा शेअर २.४२% वाढीसह २,७२२.७ रुपयांवर, एचडीएफसी लाइफचा शेअर २.१५% वाढीसह ५६७ रुपयांवर, तर एचडीबी फायनान्शियलचा शेअर १.०८% वाढीसह ७५१.९५ रुपयांवर बंद झाला.
