Rupee Hits All Time Low: इराण युद्धाचा रुपयाला फटका; डॉलरच्या तुलनेत गाठली ‘९२’ची ऐतिहासिक निचांकी पातळी

मागील सत्रात रुपया ९१.४० वर होता, तो आता डॉलरच्या तुलनेत ९२.१७ वर व्यापार करत आहे. सार्वजनिक सुट्टीमुळे ३ मार्च रोजी चलन आणि कर्जरोखे (Currency and Fixed Income Markets) बाजार बंद होते.

अमेरिका, इस्रायल आणि इराण यांच्यातील लष्करी तणाव वाढल्याने गेल्या काही दिवसांत ब्रेंट क्रूडच्या किमती प्रति बॅरल ८५ डॉलर्सपर्यंत वाढल्या आहेत.

शनिवारी अमेरिका आणि इस्रायलने इराणविरुद्ध संयुक्त लष्करी कारवाई सुरू केली आहे. या हल्ल्यांदरम्यान इराणचे सर्वोच्च नेते अयातुल्ला अली खमेनी मारले गेले.

इराणने याला प्रत्युत्तर म्हणून अमेरिका आणि इस्रायलमधील तळांना लक्ष्य करत क्षेपणास्त्र आणि ड्रोनद्वारे हल्ले केले. या सुरू असलेल्या संघर्षामुळे हॉर्मुझची सामुद्रधुनी बंद करण्यात आली आहे. याचा भारताला मोठा फटका बसणार आहे. कारण भारताच्या एकूण तेल आयातीपैकी जवळपास ४०% आयात याच मार्गावरून होते.

विश्लेषक काय म्हणाले?

फिनरेक्स ट्रेझरी ॲडव्हायझर्सच्या विश्लेषकांनी सांगितले की, “निर्यातदारांसाठी ही आता एक सुवर्णसंधी आहे, कारण ते आता त्यांच्या रोख येणाऱ्या रकमेची विक्री ९२ रुपयांपेक्षा जास्त दराने करू शकतात. दुसरीकडे, आयातदारांना आता डॉलर खरेदी करण्यासाठी भाव कमी होण्याची वाट पाहावी लागेल. रुपयाच्या बाबतीत आरबीआय काय पाऊल उचलते, याकडेही आमचे लक्ष असेल.”

एचडीएफसी सिक्युरिटीजचे ज्येष्ठ संशोधन विश्लेषक दिलीप परमार म्हणाले, “इराण संकटानंतर तेलाच्या किमतीत तीव्र वाढ झाल्यामुळे रुपया घसरला कारण गुंतवणूकदार सुरक्षित मालमत्तांकडे वळत आहेत. परकीय भांडवल कमी होण्याच्या चिंतेमुळे आणि वाढत्या आयात खर्चामुळे चलनावर आणखी दबाव आला.”

कच्च्या तेलाच्या वाढत्या किमतीचा परिणाम

कच्च्या तेलाच्या वाढत्या किमतींमुळे केवळ आयात बिलच वाढत नाही तर महागाईही वाढते, चालू खात्यातील तूट वाढते आणि तेल शुद्धीकरण कंपन्यांकडून डॉलरची मागणी वाढते, ज्यामुळे रुपयावर दबाव येतो. सोमवारी (२ मार्च) परदेशी गुंतवणूकदारांनी भारतीय शेअर बाजारातून ३५० दशलक्ष डॉलर्सपेक्षा जास्त रक्कम काढून घेतली होती.