Stock Market Crash: शेअर बाजारात तेजीचे पुनरागमन! युद्धविराम चर्चेमुळे गुंतवणूकदारांमध्ये उत्साहाचे वातावरण

सोमवारी सेन्सेक्स सुमारे १५८ अंशांनी वधारून ७३,४७७.५३ वर उघडला, तर निफ्टी ५० ने सुमारे ६७ अंशांची वाढ नोंदवत २२,७८० वर सुरुवात केली. पण, हे प्रमुख निर्देशांक काही मिनिटांतच घसरणीच्या क्षेत्रात गेले. सकाळी ९.३० वाजताच्या स्थितीनुसार, सेन्सेक्स ३६० हून अधिक अंशांनी घसरून ७२,९५८ वर पोहोचला, तर निफ्टी ५० सुमारे ९६ अंशांनी खाली येऊन २२,६१७ वर स्थिरावला.

इंडिगो, कोटक महिंद्रा बँक, रिलायन्स इंडस्ट्रीज, सन फार्मा, अदाणी पोर्ट्स आणि आयसीआयसीआय बँक हे सेन्सेक्समधील सर्वाधिक घसरण झालेले शेअर्स होते, त्यांच्या मूल्यात १-२ टक्क्यांहून अधिक घट झाली. तर झुडिओची मूळ कंपनी असलेल्या ट्रेन्ट, तसेच टेक महिंद्रा, टायटन, इन्फोसिस आणि पॉवर ग्रीडच्या शेअर्सनी १-४ टक्क्यांची वाढ नोंदवली.

एनएसईवर सुमारे १,७०२ शेअर्सच्या किमतीत घसरण झाली, तर १,०३६ शेअर्सनी वाढ नोंदवली आणि ८५ शेअर्स स्थिर राहिले. क्षेत्रांनुसार विचार करता, निफ्टी ऑयल अँड गॅस हा सर्वाधिक घसरण झालेल्या निर्देशांकांपैकी एक होता. यात १.३ टक्क्यांहून अधिक घट झाली. याविरोधात, निफ्टी पीएसयू बँकने १ टक्क्यांहून अधिक वाढ नोंदवली.

ट्रम्प यांच्या धमक्यांमुळे इराण-अमेरिका युद्धाच्या तीव्रतेबाबत चिंता वाढली

ट्रम्प यांनी रविवारी असा दावा केला की, जर इराणने तेल आणि इतर व्यापाराच्या वाहतुकीसाठी अत्यंत महत्त्वाचा जलमार्ग असलेली ‘स्ट्रेट ऑफ होर्मुझ’ खुली केली नाही, तर मंगळवारी अमेरिका इराणवरील आपले हल्ले मोठ्या प्रमाणावर वाढवेल.

ट्रूथ सोशल या समाजमाध्यमावर एका अत्यंत कठोर शब्दांतील पोस्टमध्ये अमेरिकेच्या राष्ट्राध्यक्षांनी लिहिले, “इराणमध्ये मंगळवार हा ‘पॉवर प्लांट डे’ आणि ‘ब्रिज डे’ (हल्ल्याचा दिवस) असेल. यापूर्वी असे काहीही घडले नसेल. तो श्रापित जलमार्ग खुला करा, अरे वेड्यांनो, अन्यथा तुम्हाला नरकयातना भोगाव्या लागतील फक्त बघत राहा!”

सध्या काय आहे बाजाराची परिस्थिती?

सकाळी ११:०० वाजता सेन्सेक्स ३०४.९६ अंकांनी (किंवा ०.४२ टक्क्यांनी) घसरून ७३,०१४.५९ वर, तर निफ्टी ८३.२० अंकांनी (किंवा ०.३७ टक्क्यांनी) घसरून २२,६२९.९० वर व्यवहार करत होता. यावेळी सुमारे २४३८ शेअर्समध्ये वाढ झाली, १२९५ शेअर्समध्ये घसरण झाली आणि १७२ शेअर्समध्ये कोणताही बदल झाला नाही.

दुपारी १२:०० वाजता सेन्सेक्स १४१.८४ अंशांनी (किंवा ०.१९ टक्क्यांनी) घसरून ७३,१७७.७१ ​​वर, तर निफ्टी ३१.३० अंशांनी (किंवा ०.१४ टक्क्यांनी) घसरून २२,६८१.८० वर व्यवहार करत होता. या दरम्यान सुमारे २५३१ शेअर्समध्ये वाढ झाली, १३१० शेअर्समध्ये घसरण झाली आणि १६३ शेअर्समध्ये कोणताही बदल झाला नाही.

युद्धविरामाच्या वृत्ताच्या चर्चेमुळे सेन्सेक्सची उसळी

इराण आणि अमेरिका यांच्यातील युद्ध संपुष्टात आणण्यासाठी आणि तातडीने युद्धविराम लागू करण्याच्या उद्देशाने तयार करण्यात आलेली एक योजना दोन्ही देशांना प्राप्त झाली असल्याच्या वृत्तांमुळे, सोमवारी सेन्सेक्स आणि निफ्टी या प्रमुख शेअर निर्देशांकांनी सुरुवातीच्या घसरणीतून सावरत जोरदार मुसंडी मारली.

दुपारी ०२:०० वाजता सेन्सेक्स ६०४.५७ वाढून ७३,९२४.१२ ​​वर, तर निफ्टी २०२.०५ अंशांनी वाढून २२,९१५.१५ वर व्यवहार करत होता.

दुपारच्या सत्राच्या उत्तरार्धातही बाजारातील तेजी कायम राहिली. दुपारी ३:०० वाजता सेन्सेक्स सुमारे ७४० अंशांनी वधारून ७४,०३९ वर पोहोचला, तर निफ्टी १ टक्क्यांहून अधिक वाढीसह २२,९४६ वर व्यवहार करत होता. सुरुवातीच्या कमकुवत कामगिरीनंतर बाजारात झालेली ही सुधारणा अधिक बळकट झाली, ज्याला भू-राजकीय घडामोडींबाबत सुधारत असलेल्या सकारात्मक वातावरणाचा आधार मिळाला.