JIO IPO साठी गुंतवणूकदारांना पाहावी लागणार आणखी वाट; का होत आहे विलंब? समोर आली माहिती

या प्रकरणाशी परिचित असलेल्या व्यक्तींनी नाव न सांगण्याच्या अटीवर माहिती दिली आहे की, रिलायन्स सध्या अधिकृतपणे बँकर्सची नियुक्ती करण्यासाठी आणि ‘ड्राफ्ट आयपीओ प्रॉस्पेक्टस’ दाखल करण्यासाठी सेबीने सुचवलेल्या बदलांना सरकारने अधिकृत स्वरूप देण्याची प्रतीक्षा करत आहे. सरकारच्या अधिसूचनेवर अवलंबून कंपनीचे आता एप्रिलपूर्वी हा ड्राफ्ट आयपीओ प्रॉस्पेक्टस दाखल करण्याचे उद्दिष्ट असल्याचे त्यांनी सांगितले. या बाबत इकॉनॉमिक टाईम्सने वृत्त दिले आहे.

भारतातील सर्वात मोठी दूरसंचार कंपनी असलेली जिओ ही मुकेश अंबानींच्या रिलायन्स समूहातील सर्वात मौल्यवान कंपन्यांपैकी एक आहे. गेल्या २० वर्षांतील रिलायन्सच्या एखाद्या प्रमुख उपकंपनीचे शेअर बाजारातील हे पहिलेच लिस्टिंग असेल आणि हा भारतातील आतापर्यंतचा सर्वात मोठा आयपीओ ठरू शकतो.

इन्व्हेस्टमेंट बँकर्सनी या कंपनीचे मूल्यांकन १७० अब्ज डॉलर्स इतके प्रस्तावित केले आहे. त्यामुळे गेल्या दहा वर्षांतील जगातील एका मोठ्या यशस्वी कंपनीत पैसे गुंतवण्याची ही गुंतवणूकदारांसाठी मोठी संधी ठरेल.

अंबानी यांनी गेल्या वर्षी ऑगस्टमध्ये म्हटले होते की, रिलायन्सचे २०२६ च्या पहिल्या सहामाहीत जिओ शेअर बाजारात सूचीबद्ध करण्याचे उद्दिष्ट आहे. या आयपीओचे संकेत त्यांनी सर्वप्रथम २०१९ मध्ये दिले होते. त्या वेळी त्यांनी पाच वर्षांची कालमर्यादा निश्चित केली होती.

सर्वोच्च मूल्यांकन मिळाल्यास किमान हिस्सा विकून सुमारे ४.३ अब्ज डॉलर्स उभे केले जाऊ शकतात, ज्यामुळे ही कंपनी बाजारमूल्यानुसार भारतातील सर्वात मोठ्या कंपन्यांच्या यादीत स्थान मिळवेल. मेटा प्लॅटफॉर्म्स इंक. आणि अल्फाबेट इंक. यांनी २०२० मध्ये जिओमध्ये एकूण १० अब्ज डॉलर्सपेक्षा जास्त गुंतवणुकीची घोषणा केली होती.