Pakistan Stock Market: पाकिस्तानचा शेअर बाजार १६ हजार अंशांनी कोसळला; वेळेपूर्वीच थांबवावे लागले ट्रेडिंग

भू-राजकीय अस्थिरतेमुळे गेल्या काही दिवसांपासून जगभरातील गुंतवणूकदार चिंतेत आहेत. अशात शनिवार आणि रविवारच्या सुट्टीनंतर केएसई-१०० आज उघडला, तेव्हा तो १५,००० हून अधिक अंकांनी कोसळला. यामुळे पाकिस्तान शेअर बाजारातील व्यवहार थांबवावे लागले होते.

टॉपलाइन सिक्युरिटीजचे मुख्य कार्यकारी अधिकारी मोहम्मद सोहेल यांच्या मते, “काही फंड्स आणि ‘लिव्हरेज्ड प्लेयर्स’ (कर्ज घेऊन गुंतवणूक करणारे) यांच्या विक्रीमुळे सुरुवातीला बाजारात अस्थिरता निर्माण झाली होती.”

सकाळी १०:३० च्या सुमारास जेव्हा व्यवहार पुन्हा सुरू झाले, तेव्हा निर्देशांक मागील बंद १,६८,०६२.१६ च्या तुलनेत १२,३३४.८८ अंकांनी खाली होता, म्हणजेच त्यात ७.३४ टक्क्यांची घसरण झाली होती.

सोहेल यांनी पुढे सांगितले की, व्यवहार थांबवल्यानंतर काही प्रमाणात खरेदी दिसून आली. कारण गुंतवणूकदारांच्या लक्षात आले की बाजार आधीच त्याच्या अलीकडील उच्चांकावरून २० टक्क्यांनी पडला आहे आणि आता शेअर्सच्या किमती आकर्षक स्तरावर आहेत. सकाळी ११:०७ वाजेपर्यंत बाजार थोडा सावरला आणि ९,१६४.६२ अंशांच्या घसरणीसह व्यवहार करत होता.

मात्र, बाजार बंद होताना निर्देशांक १,५१,९७२.९९ अंकांवर स्थिरावला, जो दिवसाच्या निचांकी स्तरापेक्षा किंचित वर होता. मागील क्लोजिंग प्राईजच्या तुलनेत ही एकूण ९.५७ टक्क्यांची मोठी घसरण ठरली.

अमेरिका-इस्रायलने इराणवर केलेल्या हल्ल्यांनंतर पाकिस्तानमध्ये वाढत्या अशांततेच्या पार्श्वभूमीवर शेअर बाजारातील घसरण झाली. आठवड्याच्या शेवटी झालेल्या हल्ल्यांमध्ये इराणचे सर्वोच्च नेते अली खामेनी यांचा मृत्यू झाल्याचे वृत्त आहे, ज्यामुळे इस्रायल आणि इतर देशांवर, ज्यात अमेरिकन लष्करी तळ असलेल्या आखाती देशांचा समावेश आहे, प्रत्युत्तर म्हणून इराणी हल्ले सुरू झाले आहेत.

अमेरिकेचे अध्यक्ष डोनाल्ड ट्रम्प यांनी संकेत दिले की अमेरिका-इस्रायल लष्करी हल्ले आणखी काही आठवडे चालू राहू शकतात. यामुळे व्यापक प्रादेशिक संघर्षाची भीती वाढली आहे आणि जागतिक बाजारपेठेत भीती निर्माण झाली आहे.