सत्तर टक्के महिलांकडून बचत; गुंतवणूक मात्र ४० टक्के महिलांकडूनच; ‘हर वेल्थ, हर वे’ अहवालातील निष्कर्ष

हा अहवाल दिल्ली, मुंबई, कोलकाता, पुणे, अहमदाबाद, लखनौ, जयपूर, नागपूर, रांची, भोपाळ, गुवाहाटी आणि म्हैसूर आदी महानगरांसह उदयोन्मुख शहरांमधील २,००० हून अधिक महिलांच्या सर्वेक्षणावर आधारित आहे.  

वर्तणुकीशी संबंधित अडथळे कायमच

म्युच्युअल फंड हे सर्व वयोगटातील महिलांसाठी पहिल्या तीन गुंतवणूक पर्यायांपैकी एक म्हणून उदयास आले आहेत. तथापि, वर्तणुकीशी संबंधित अडथळे अजूनही कायम आहेत. अनेक महिला अजूनही सल्ल्यासाठी कुटुंबातील सदस्यांवर अवलंबून आहेत आणि आपल्या उत्पन्नातील अल्प हिस्सा भांडवली बाजाराशी निगडित गुंतवणुकीत गुंतवत आहेत.

अहवाल एका दृष्टिक्षेपात

१) जवळपास ७० टक्के भारतीय महिला नियमितपणे बचत करतात; परंतु पारंपरिक साधनांच्या पलीकडे (उदा. मुदत ठेवी, सोने) गुंतवणूक करणाऱ्या महिलांचे प्रमाण केवळ ४० टक्के आहे.

२) म्युच्युअल फंडात गुंतवणूक करणाऱ्या जवळपास ८० टक्के महिला वयाच्या ३५व्या वर्षापूर्वीच गुंतवणुकीला सुरुवात करतात. तरुण महिलांमध्ये ‘एसआयपी’ करण्याचे प्रमाण सर्वाधिक आहे.

३) एखाद्या महिलेच्या गुंतवणुकीच्या पद्धतीवर तिच्या शहरापेक्षा तिच्या आयुष्यातील टप्प्याचा सर्वाधिक प्रभाव असतो.

४) ‘टियर टू’ श्रेणीतील आणि लहान शहरांमधील महिला गुंतवणूकदारांच्या संख्येत वार्षिक अडीच पटीने वाढ झाली आहे. ‘टियर फोर’ श्रेणीतील शहरांमध्ये १४० टक्के वाढ दिसून आली आहे.

५) गुंतवणुकीच्या मार्गातील सर्वांत मोठा अडथळा आत्मविश्वास हा आहे. गुंतवणूक न करणाऱ्या ७४ टक्के महिला त्यांच्या उत्पन्नातील १० टक्क्यांहून कमी हिस्सा वित्तीय उत्पादनांमध्ये गुंतवतात.

६) एकदा महिलांनी म्युच्युअल फंडात गुंतवणूक करण्यास सुरुवात केली, की त्या दीर्घकाळ टिकून राहतात. ८६ टक्के महिलांनी पुढील पाच वर्षांत आपली गुंतवणूक वाढवण्याची योजना आखली आहे.

७) निम्म्याहून अधिक भारतीय महिला गुंतवणुकीच्या सल्ल्यासाठी अजूनही घरातील पुरुषांवर अवलंबून आहेत; विशेषतः ‘टियर टू’ आणि उदयोन्मुख शहरांमध्ये हे प्रमाण अधिक आहे.

८) म्युच्युअल फंडात गुंतवणूक करणाऱ्या ८२ टक्के महिला घरातील आर्थिक निर्णयांमध्ये सक्रियपणे सहभागी होतात.

९) गुंतवणूक उत्पादने स्पष्टपणे समजावून सांगितली गेली, तर ५७ टक्के महिला इक्विटीमध्ये (शेअर बाजाराशी संबंधित) दीर्घकालीन गुंतवणूक करण्यास तयार आहेत.

१०) ६४ टक्के महिला गुंतवणूकदारांसाठी ‘एसआयपी’ हा गुंतवणुकीचा पसंतीचा मार्ग आहे.