कोटक म्युच्युअल फंडचा नवा NFO लाँच; अवघ्या १ हजार रुपयांत बँकिंग क्षेत्रातील टॉप १४ शेअर्समध्ये गुंतवणुकीची संधी

हा फंड गुंतवणूकदारांना पॅसिव्ह गुंतवणूक धोरणाद्वारे भारतातील बँकिंग क्षेत्रात गुंतवणूक करण्याची संधी देतो. हा फंड निफ्टी बँक इंडेक्सशी संबंधित आहे, जो भारतातील सर्वात मोठ्या आणि सर्वाधिक तरल बँकिंग कंपन्यांच्या भांडवली बाजारातील कामगिरीचे प्रतिबिंब दर्शवतो.

या इंडेक्समध्ये एनएसई (NSE) वर सुचिबद्ध असलेल्या १४ बँकिंग स्टॉक्सचा समावेश आहे आणि क्षेत्राचे योग्य प्रतिनिधित्व राखण्यासाठी दर सहा महिन्यांनी त्याचे पुनर्संतुलन केले जाते. निफ्टी बँक इंडेक्स आपल्या घटक समभागांच्या निवडीसाठी एक पारदर्शक आणि नियमांवर आधारित प्रक्रिया अवलंबतो. बँकिंग क्षेत्रातील पात्र कंपन्यांची निवड ट्रेडिंगची वारंवारता, लिस्टिंगचा इतिहास, तरलता आणि फ्री-फ्लोट बाजार भांडवल यांसारख्या मापदंडांच्या आधारे केली जाते.

ऐतिहासिक आकडेवारीनुसार, बँकिंग क्षेत्राने दीर्घकाळात उल्लेखनीय कामगिरी केली आहे. निफ्टी बँक टीआरआयने स्थापनेपासून सुमारे १७.८% चा चक्रवाढ वार्षिक वाढ दर (CAGR) दिला आहे, तर निफ्टी ५० टीआरआयने याच कालावधीत सुमारे १२.३% चा CAGR गाठला आहे.

कोटक महिंद्रा एएमसी लिमिटेडचे व्यवस्थापकीय संचालक, निलेश शाह म्हणाले की, बँकिंग क्षेत्र हे गेल्या अनेक वर्षांपासून भारताच्या आर्थिक आणि वित्तीय विकासाचा आधारस्तंभ राहिले आहे. निफ्टी ५० निर्देशांकामध्ये बँकांचा वाटा ३०% पेक्षा जास्त आहे, ज्यामुळे त्या भारताच्या विकासाची गाथा आणि शेअर बाजाराच्या कामगिरीचे प्रमुख चालक ठरतात. निफ्टी बँक निर्देशांकाची दीर्घकालीन कामगिरी या क्षेत्राची ताकद आणि स्थिरता दर्शवते. कोटक निफ्टी बँक इंडेक्स फंडाच्या माध्यमातून, गुंतवणूकदारांना भारतातील आघाडीच्या बँकिंग संस्थांमध्ये गुंतवणूक करण्याची संधी मिळेल, ज्यामुळे त्यांना भारतीय शेअर बाजारातील सर्वात प्रभावशाली क्षेत्रांमध्ये सहभागी होता येईल.

कोटक महिंद्रा एएमसी लिमिटेडचे फंड मॅनेजर, सतीश दोंडापती म्हणाले की, कोटक निफ्टी बँक इंडेक्स फंड हा अशा गुंतवणूकदारांसाठी तयार करण्यात आला आहे, ज्यांना वैयक्तिक स्टॉक निवडण्याच्या गुंतागुंतीशिवाय भारतातील बँकिंग क्षेत्रात लक्ष्यित गुंतवणूक करायची आहे.

म्युच्युअल फंड कंपनीच्या मते, ‘कोटक निफ्टी बँक इंडेक्स फंड’मध्ये १,००० रुपयांपासून गुंतवणूक सुरू करता येते.