म्युच्युअल फंडांच्या श्रेणीत ३६ वरून ४० पर्यंत ‘सेबी‘कडून वाढ

म्युच्युअल फंड गुंतवणुकीत एकसमानता आणि गुंतवणूकदार संरक्षण वाढविण्यासाठी प्रकटीकरण आणि ‘पोर्टफोलिओ ओव्हरलॅप’ रोखण्यासंबधी नियम सेबीने अधिक कठोर केले आहेत. ‘ट्रू-टू-लेबल पोझिशनिंग’ सुनिश्चित करणे म्हणजेच योजनांप्रमाणेच तिचे नाव आवश्यक असून नावांमध्ये अतिरंजित परताव्याच्या दाव्यांना आळा घालणे या उद्देशाने हे पाऊल उचलले गेले आहे.

सेबीने या परिपत्रकात, योजनांचे व्यापकपणे पाच श्रेणींमध्ये वर्गीकरण केले आहे – इक्विटी (समभाग संलग्न), डेट (रोखे), हायब्रिड, लाइफ सायकल आणि इतर योजना – फंड ऑफ फंड स्कीम आणि इंडेक्स फंड किंवा ईटीएफ (एक्सचेंज ट्रेडेड फंड) सारख्या निष्क्रिय योजना. गुंतवणूकदारांना सहज नावे ओळखता यावी म्हणून, म्युच्युअल फंडांमधील विशिष्ट श्रेणीतील योजनांच्या नावांमध्ये एकरूपता आणण्यासाठी आणि योजना नामाभिधानाला साजेशा (ट्रू-टू-लेबल) राहतील याची खात्री करण्यासाठी, योजनेचे नाव श्रेणीसारखेच असले पाहिजे असे सेबीने म्हटले आहे. योजनेच्या केवळ परताव्याच्या पैलूवर प्रकाश टाकणारे शब्द/वाक्प्रचार योजनेच्या नावात वापरले जाऊ नयेत, असेही त्यात म्हटले आहे.

सोल्युशन ओरिएंटेड श्रेणी तात्काळ प्रभावाने बंद

परिपत्रकानुसार, सोल्युशन ओरिएंटेड स्कीम्स श्रेणी तात्काळ प्रभावाने बंद करण्यात आली आहे. या श्रेणीतील विद्यमान योजना नवीन सबस्क्रिप्शन स्वीकारणे थांबवतील आणि सेबीच्या पूर्व मंजुरीच्या अधीन राहून समान मालमत्ता वाटप आणि जोखीम प्रोफाइल असलेल्या इतर योजनांमध्ये विलीन होतील. सोल्युशन ओरिएंटेड फंड्स म्हणजे विशिष्ट आर्थिक उद्दिष्टे साध्य करण्यासाठी तयार केलेल्या योजना असतात, जसे की निवृत्तीचे नियोजन करणे किंवा मुलांच्या शिक्षणासाठी निधी जमवण्यासाठीची योजना.

लाइफ सायकल फंड्सची सुरुवात

लाइफ सायकल फंड्स श्रेणीची सुरुवात ओपन-एंडेड योजना म्हणून केली ज्यामध्ये पूर्व-निर्धारित परिपक्वता आणि इक्विटी, कर्जरोखे, इनव्हिट, ईटीसीडी आणि गोल्ड/सिल्व्हर ईटीएफमध्ये ध्येय-आधारित गुंतवणुकीची ही रणनीती असेल. पुढे, योजना परिपक्वता जवळ येताच इक्विटीमधील गुंतवणूक हळूहळू कमी होते, रोख्यांमधील गुंतवणूक वाढवली जाते. लाइफ सायकल फंड्सची रचना ५ वर्ष ते ३० वर्षांपर्यंतच्या वेगवेगळ्या लक्ष्य परिपक्वतांमध्ये केली जाऊ शकते. यामुळे गुंतवणूकदारांना त्यांच्या निवृत्तीच्या क्षितिजाशी जुळणारा निधी निवडता येतो.

सेबीचे नवीन वर्गीकरण नियम हे किरकोळ गुंतवणूकदारांसाठी वाढत्या प्रमाणात गुंतागुंतीचे बनलेल्या उद्योगाला सोपे करण्याच्या दिशेने एक अर्थपूर्ण पाऊल आहे. – निकुंज सराफ, मुख्याधिकारी, चॉइस वेल्थ