8th Pay Commission: फिटमेंट फॅक्टर ३ पेक्षा जास्त होणार? सरकारी कर्मचाऱ्यांचा पगार थेट ‘इतक्या’ पटीने वाढणार!

सातव्या आयोगात फिटमेंट फॅक्टर किती होता?

मागील दोन वेतन आयोगांच्या (म्हणजेच ६ व्या आणि ७ व्या) काळात, फिटमेंट फॅक्टर अनुक्रमे १.८६ आणि २.५७ इतका निश्चित करण्यात आला होता. यावेळी हा फॅक्टर ३ च्या पुढे असावा अशी मागणी कर्मचारी संघटनांनी केली आहे. सरकारने कर्मचाऱ्यांची मागणी मान्य केल्यास सरकारी तिजोरीवर मोठा भार पडणार आहे.

फिटमेंट फॅक्टर म्हणजे काय?

सोप्या भाषेत सांगायचे तर, फिटमेंट फॅक्टर हे एक असे सूत्र (गुणांक) आहे, ज्याद्वारे विद्यमान मूळ वेतन वाढवून नवीन वेतन निश्चित केले जाते. या फॅक्टरवर केवळ तुमचा मूळ पगारच नाही, तर महागाई भत्ता, घरभाडे भत्ता आणि इतर भत्तेही अवलंबून असतात. त्यामुळेच, हा आकडा जेवढा मोठा असेल, तेवढा पगार जास्त वाढणार आहे.

आगामी काळात देशातील मुख्य शहरांत बैठका

८ वा वेतन आयोग आगामी काळात दिल्लीत ७ आणि १० ऑगस्ट, चेन्नईमध्ये ७-८ सप्टेंबर आणि पुद्दुचेरीमध्ये ९ सप्टेंबर रोजी बैठका घेणार आहे. या बैठकांदरम्यान कर्मचारी संघटना आणि पेन्शनधारक आयोगासमोर आपल्या शिफारसी मांडू शकतात आणि आपल्या तक्रारी सांगू शकतात.

फिटमेंट फॅक्टरनुसार किती पगार वाढेल?

सरकार किती फिटमेंट फॅक्टर वाढवू शकते?

‘बँकबाझार’चे मुख्य कार्यकारी अधिकारी आदिल शेट्टी म्हणाले, की सध्या तरी ३ पेक्षा जास्त ‘फिटमेंट फॅक्टर’ यावरील चर्चा केवळ तर्क-वितर्कांवर आधारित आहे. कारण ८ व्या वेतन आयोगाने अद्याप आपल्या शिफारसी सादर केलेल्या नाहीत. मात्र, उच्च ‘फिटमेंट फॅक्टर’मुळे सरकारचा वेतन आणि पेन्शनवरील खर्च मोठ्या प्रमाणात वाढेल. अमेरिकेचा टॅरिफ, कच्च्या तेलाचे भडकलेले भाव आणि मध्यपूर्वेतील संघर्ष यामुळे भारतीय अर्थव्यवस्थेवर परिणाम झाला आहे. अशा परिस्थितीत सरकार तिजोरीवर किती भार देईल, हे पाहणे महत्त्वाचे ठरणार आहे. केंद्र सरकार ३ किंवा त्यापेक्षा जास्त ‘फिटमेंट फॅक्टर’चा भार पेलू शकेल का, या प्रश्नाचे उत्तर ८ व्या वेतन आयोगाची समिती सरकारला आपल्या शिफारसी सादर केल्यानंतरच मिळेल.