मुंबईत केवळ एका पेटीसह पाऊल ठेवले अन् उभारल्या ६ लाख कोटींच्या कंपन्या; ‘वेदांता’चे अनिल अग्रवाल म्हणतात, ‘आमची मुंबई…’

आज लाखो कोटी रुपयांचे उद्योग उभारणाऱ्या अनिल अग्रवाल यांच्या मनात कर्मभूमी मुंबईबाबत एक वेगळे स्थान आहे. अनिल अग्रवाल यांनी अनेक देश आणि शहरांना भेटी दिल्या आहेत, पण मुंबईची सर कशालाच येत नाही, असे त्यांचे म्हणणे आहे. “मला ‘आमची मुंबई’ खूप आवडते. त्यात काहीतरी खास आहे”, असे ते म्हणतात.

इतर अनेकांप्रमाणेच, तेही मुंबईमध्ये उपजीविकेच्या शोधात आले होते. तो काळ १९७० च्या दशकाच्या मध्यातील होता. बिहारच्या पाटण्यातील एक तरुण असलेल्या अग्रवाल यांना तो काळ आजही आठवतो. “मुंबईत पाऊल ठेवताना माझ्याजवळ फक्त एक पेटी आणि एक स्वप्न होतं”, असे ते सांगतात. याबाबत बिझनेस टुडेच्या वृत्तात उल्लेख आहे.

अग्रवाल सध्या लंडनमध्ये राहत असले तरी, त्यांची साधी हिंदी असो वा अस्सल विनोदबुद्धी, त्यांच्या व्यक्तिमत्त्वाचा प्रत्येक पैलू भारतीयच आहे. चेहऱ्यावर हलकेसे हास्य आणत ते भूतकाळातील महत्त्वाच्या घटना निवडतात, त्यांची वर्तमानाशी सांगड घालतात आणि भविष्याचे चित्र रेखाटण्याचा प्रयत्न करतात.

“अर्थातच, या प्रवासात अनेक अपयशे आली. पण त्यामुळे मी दारा सिंग यांच्यासारखा अधिकच खंबीर झालो. हे सर्व माझ्या धैर्यामुळे आणि अनेक लोकांकडून मिळालेल्या पाठिंब्यामुळेच शक्य झाले आहे”, असे ते म्हणतात.

वेदांता समूहाचा भविष्यातील दृष्टीकोण

वेदांता समूहाच्या भविष्यातील दृष्टीकोणाविषयी ते म्हणतात, “ही तर केवळ सुरुवात आहे. ॲल्युमिनियम क्षेत्रात आम्ही मिश्रधातूंची निर्मिती वाढवून उत्पादन खर्च किमान २० टक्क्यांनी कमी करणार आहोत. खाणकामात आम्ही तंत्रज्ञानाचा वापर करून कंट्रोल रूममधून कामकाज चालवणार आहोत. प्रत्येक व्यवसायात खर्च कमी करणे आणि उत्पादन वाढवणे हे आमचे ध्येय आहे.”

“वेदांतासाठी हा मोठ्या परिवर्तनाचा काळ आहे. कंपन्यांची शेअर बाजारात नोंदणी झाल्यामुळे भांडवल उभारणीचे अनेक पर्याय खुले झाले आहेत. माझ्या दृष्टीने, हा एक नवा वेदांता समूह आहे”, अशा शब्दांत अग्रवाल यांनी वेदांताबाबत भाष्य केल्यचा उल्लेखही बिझनेस टुडेच्या वृत्तात आहे.