२०० किमीपर्यंतची रेंज, १० वर्षांची बॅटरी वॉरंटी अन् कारचे फीचर्स! ‘एथर’कडून नवीन ‘कोनार्क’ ई-स्कूटर लाँच

मॅजिक की

मॅजिक कीमुळे ग्राहकाला स्कूटरची चावी सोबत बाळगण्याची आवश्यकता राहत नाही. याचबरोबर स्कूटरची चावी हरविल्यास त्याला बनावट चावी बनवावी लागत नाही. मॅजिक की म्हणजेच एक प्रकारचा रिमोट असून, तुमच्या खिशात तो ठेवल्यानंतर तुम्ही स्कूटरवर बसल्यावर ती आपोआप सुरू होते. तिला चावी लावून सुरू करण्याची आवश्यकता नसते. अत्याधुनिक आणि तरुण पिढीला आवडेल, असे हे वैशिष्ट लक्षवेधी ठरत आहे.

ऑटोपॉप

अनेक वेळा आपण खरेदी करताना आपल्या दोन्ही हातात पिशव्या असतात. अशा वेळी स्कूटरची डिक्की उघडणे हे त्रासदायक काम ठरते. हातातील पिशव्यांसह डिक्की उघडण्याची कसरत करावी लागते. आता कोनार्क स्कूटरमध्ये ऑटोपॉप ही सुविधा देण्यात आली आहे. केवळ तुम्ही पायाने स्कूटरच्या मागील बाजूस स्पर्श केल्यानंतर आपोआप डिक्की उघडेल. तुम्हाला त्यासाठी हात लावण्याची आवश्यकता असणार नाही.

एअरवॉक

भारतीय रस्त्यांवरील वाहनांची गर्दी पाहता स्कूटर पार्क करणे ही मोठी डोकेदुखी ठरता. स्कूटरवर या सगळ्या गडबडीत ओरखडा तरी पडतो. त्यामुळे एअरवॉक हे वैशिष्ट या स्कूटरमध्ये देण्यात आले आहे. त्यामुळे स्कूटर तिचे संतुलन योग्य पद्धतीने साधते. याचबरोबर चालकाच्या हालचालीशी सुसंगत पद्धतीने ती पुढे मागे होते. त्यामुळे चालकाला सहजपणे स्कूटर पार्क करणे शक्य होते.

पाचव्या पिढीचे एथर बेडरॉक

एथरच्या पाचव्या पिढीच्या बेडरॉक बॅटरी प्लॅटफॉर्म मध्ये ब्रीचसेन्स नावाचे नवीन सुरक्षा तंत्रज्ञान सादर करण्यात आले आहे. ही एक रिअल-टाइम मॉनिटरिंग सिस्टीम आहे. ते अपघातानंतर होणारे बॅटरीचे सूक्ष्म नुकसान ओळखण्यासाठी बनविलेले आहे. क्वचित प्रसंगी, अपघातामुळे बॅटरीमध्ये सूक्ष्म भेगा निर्माण होऊ शकतात. त्यामुळे कालांतराने ओलावा आत प्रवेश करू शकतो. ब्रीचसेन्स अशा मायक्रो-लीक्स काही तासांत ओळखते, ज्यामुळे एथर चालकाला त्वरित इशारा मिळू शकतो.

रेंज २०० किलोमीटरपर्यंत

‘एथर कम्युनिटी डे’च्या चौथ्या आवृत्तीत या नवीन स्कूटरचे सादरीकरण करण्यात आले. कोनार्क स्कूटर सहा प्रकारांमध्ये उपलब्ध असून, तिची क्षमता (रेंज) १०० किलोमीटरपासून २०० किलोमीटरपर्यंत आहे. कंपनीने या स्कूटरच्या बॅटरीसाठी १० वर्षे अथवा १० हजार किलोमीटरची वॉरंटी कंपनीने दिली आहे. याचबरोबर मॅजिक की, ऑटो पॉप, एअर वॉक आणि ॲडव्हान्स्ड इलेक्ट्रॉनिक ब्रेकिंग सिस्टीम अशी अत्याधुनिक वैशिष्टे या स्कूटरमध्ये ग्राहकांना देण्यात आली आहेत. तसेच, या दुचाकीच्या चाकांचा आकारही मोठा ठेवण्यात आला असल्याने खड्डे असलेल्या रस्त्यातूनही आरामदायी प्रवास शक्य होणार आहे.

चारपैकी एक इलेक्ट्रिक दुचाकी

एथर एनर्जीचे सहसंस्थापक व मुख्याधिकारी तरुण मेहता म्हणाले की, देशातील दुचाकींच्या विक्रीत ई-दुचाकींचे प्रमाण वाढत आहे. देशात विक्री होणाऱ्या प्रत्येक चार दुचाकींपैकी एक इलेक्ट्रिक आहे. आगामी काळात हे प्रमाण आणखी वाढत जाणार आहे. सुरूवातीच्या काळात अनेक ग्राहक इलेक्ट्रिक वाहनांबद्दल साशंक होते. आता त्या शंका दूर झाल्या असून, योग्य दुचाकीच्या प्रतीक्षेत ते आहेत. त्यांना ‘कोनार्क’मुळे अतिशय चांगला इलेक्ट्रिक स्कूटरचा पर्याय उपलब्ध होणार आहे. या स्कूटरची एका चार्जिंगमध्ये धावण्याची क्षमता २०० किलोमीटरपर्यंत आहे. त्यामुळे एकदा चार्ज करून आठवडाभर तिचा वापर करता येऊ शकतो.