FSSAI ची मोठी कारवाई! हर्बल प्रॉडक्ट बनवणाऱ्या कंपनीचा कारखाना पाहून अधिकारी शॉक; अखेर परवाना रद्द

FSSAI च्या तपासात काय आढळलं?

FSSAI च्या विशेष पथकाने संबंधित निर्मिती प्रकल्पाला अचानक भेट देऊन पाहणी केली. यावेळी कारखान्याची अवस्था पाहून अधिकारीही शॉक झाले. तपासात अन्न उत्पादन प्रक्रियेत मानकांचा अभाव, अस्वच्छता, आरोग्यविषयक निष्काळजीपणा आणि अन्न सुरक्षा नियमांचे उल्लंघन समोर आले. FSSAI च्या अधिकाऱ्यांनी दिलेल्या माहितीनुसार, या त्रुटींमुळे उत्पादनांची गुणवत्ता आणि सुरक्षिततेची तपासणी करणे अशक्य झाले होते.

कारखान्यातील उत्पादन आणि कामावर पूर्ण बंदी

जोपर्यंत कारखान्यातील सर्व त्रुटी आणि कमतरता पूर्णपणे दूर केल्या जात नाहीत आणि सक्षम अधिकाऱ्यांकडून पुनरतपासणी करून हिरवा कंदील मिळत नाही, तोपर्यंत कारखान्यात कोणत्याही प्रकारचे उत्पादन किंवा व्यावसायिक गोष्टी करण्यास बंदी घालण्यात आली आहे.

एफएसएसएआयची आक्रमक मोहीम आणि ई-कॉमर्स कंपन्यांना दणका

• गेल्या काही महिन्यांपासून FSSAI ने अन्न सुरक्षा मानकांबाबत अत्यंत कठोर भूमिका घेतली आहे. रेड बुल, स्टिंग किंवा मॉन्स्टर सारख्या एनर्जी ड्रिंक्स, अल्कोहोलिक पेये आणि आरोग्याबाबत दिशाभूल करणारे दावे करणाऱ्या कंपन्यांना नोटिसा बजावण्यात आल्या आहेत.
• अनेक ई-कॉमर्स प्लॅटफॉर्म्सना त्यांच्या पोर्टलवर विकल्या जाणाऱ्या खाद्यपदार्थांच्या गुणवत्तेची आणि परवान्याची खात्री करण्याचे निर्देश देण्यात आले आहेत.
• ग्राहकांच्या प्राप्त झालेल्या तक्रारी, नियमित तपासण्या आणि अन्न सुरक्षा अधिकाऱ्यांच्या अहवालानुसार ही कारवाई केली जात आहे.

उद्योग क्षेत्रासाठी आणि ग्राहकांसाठी काय संदेश?

कुठल्याही प्रकारे अन्न सुरक्षेशी तडजोड करणाऱ्या कंपन्यांवर यापुढेही थेट निलंबन आणि कारखाने सील करण्याची कारवाई केली जाईल. बाजारात उपलब्ध असलेली उत्पादने मानकांनुसारच असावीत आणि ग्राहकांच्या आरोग्याचे रक्षण व्हावे, हा या कारवाईमागील मुख्य उद्देश आहे. या धडक कारवाईमुळे अन्न प्रक्रिया आणि पूरक आहार तयार करणाऱ्या इतर कंपन्यांचेही धाबे दणाणले आहेत.