Gold Price Drop: “सोने विकून गुंतवणूकदारांनी मोकळे व्हावे”, सिटी बँकेच्या अधिकाऱ्याचा सल्ला! सोन्याच्या किमती आणखी किती घसरणार?

लेटन यांनी सांगितले की, पश्चिम आशियातील तणाव निवळल्यामुळे तेल बाजाराबाबतचा दृष्टिकोन मोठ्या प्रमाणात बदलला आहे. त्यांना अपेक्षा आहे की, इराण-अमेरिका यांच्यातील संभाव्य करारामुळे कच्च्या तेलाचा पुरवठा वाढेल. तसेच चीनकडून असलेली कमी मागणी आणि इतर क्षेत्रांतील अतिरिक्त उत्पादनामुळे बाजारात कच्च्या तेलाचा अतिरिक्त साठा निर्माण होऊ शकतो.

त्यांच्या मते, जर सध्याच्या वाटाघाटींतून एखादा कायमस्वरूपी करार झाला, तर जागतिक तेल बाजारात कच्च्या तेलाचा मोठा अतिरिक्त साठा निर्माण होऊ शकतो, ज्यामुळे किमतींवर घसरणीचा आणखी दबाव येईल. सिटी बँकेला अपेक्षा आहे की, या वर्षाच्या अखेरीस ‘ब्रेंट क्रूड’च्या किमती प्रति बॅरल ६० ते ६५ डॉलर्सच्या दरम्यान घसरतील.

“बाजारातील तेजीच्या काळात गुंतवणूकदारांनी आपली गुंतवणूक विकून बाहेर पडावे, असे आम्ही सुचवत आहोत”, असे लेटन यांनी सांगितले. त्यांनी पुढे नमूद केले की, आगामी महिन्यांत कच्च्या तेलाच्या किमतींत चढ-उतार कायम राहण्याची शक्यता असली, तरी त्यांचा कल घसरणीकडेच असेल.

सोने आणि चांदीबाबत बोलताना लेटन म्हणाले की, गेल्या १८ ते २४ महिन्यांत सोन्याच्या दरात झालेली प्रचंड वाढ ही प्रामुख्याने गुंतवणूकदारांच्या जोरदार मागणीमुळे झाली होती. मात्र आता ती गती मंदावली आहे. मागणी अजूनही ऐतिहासिक पातळीपेक्षा अधिक असली, तरी ती इतकी मंदावली आहे की त्यामुळे अल्प मुदतीत सोन्याच्या किमतींवर दबाव राहू शकतो.

पुढील काही आठवड्यांमध्ये सोन्याची किंमत कमी राहील अशी अपेक्षा आहे, कारण वाढलेले व्याजदर आणि मजबूत अमेरिकन डॉलर गुंतवणूकदारांच्या भावनांवर दबाव आणत आहेत. सिटी बँकेच्या मते, वर्षाच्या उत्तरार्धात पुन्हा आकर्षक होण्यापूर्वी या सोन्याची किंमत आणखी घसरू शकते.

सोने खरेदीची योग्य वेळ कोणती?

“पुढील दोन महिन्यांत किंमत कमी झाल्यावर सोने खरेदी करणे योग्य ठरेल”, असे लेटन यांनी नमूद केले. पुढे सांगितले की, चौथ्या तिमाहीत अधिक चांगली संधी मिळू शकते, कारण कमी व्याजदर आणि घटत्या महागाईच्या अपेक्षा किमतींना आधार देतील.

लेटन यांना अशीही अपेक्षा आहे की चांदी सोन्याच्याच दिशेने वाटचाल करेल. त्यांनी नमूद केले की, अलीकडील वाढ ही औद्योगिक मागणीपेक्षा गुंतवणूकदारांच्या मागणीमुळे अधिक झाली होती.