Gold Silver Price : सोन्याच्या दरात एकाच दिवसात २,९०० रुपयांची वाढ! चांदीनेही ओलांडला अडीच लाखांचा टप्पा

सोन्याच्या दरात एकाच दिवसात २,९०० रुपयांची वाढ

राजधानी दिल्लीत २४ कॅरेट सोन्याचा भाव प्रति १० ग्रॅम १.५२ लाख रुपयांवर पोहोचला आहे. तसेच, दागिन्यांसाठी वापरल्या जाणाऱ्या २२ कॅरेट सोन्याची किंमतही १.३९ लाख रुपयांच्या पुढे गेली आहे. गेल्या सत्रात सोन्याच्या किमतीत सुमारे २,९०० रुपयांची वाढ झाल्याने सराफा बाजारात मोठी खळबळ उडाली आहे.

प्रमुख शहरांमधील स्थिती

मुंबई आणि कोलकाता या शहरांमध्ये २४ कॅरेट सोन्याचा दर प्रति १० ग्रॅम १.५२ लाख रुपयांच्या आसपास स्थिरावला आहे. दक्षिण भारतात सोन्याची मागणी अधिक असल्याने चेन्नईत किमती इतर शहरांच्या तुलनेत अधिक उच्चांकी स्तरावर पोहोचल्या आहेत.

चांदीची ऐतिहासिक झेप

केवळ सोनेच नाही, तर चांदीनेही गुंतवणूकदारांना आश्चर्याचा धक्का दिला आहे. औद्योगिक मागणी आणि गुंतवणूकदारांच्या वाढत्या रसामुळे दिल्लीत चांदीचा भाव २.६५ लाख रुपये प्रति किलोच्या जवळ पोहोचला आहे. गेल्या काही दिवसांतील ही सर्वात मोठी दरवाढ मानली जात आहे.

कमोडिटी बाजारात काय स्थिती?

कमोडिटी बाजारातही सोने आणि चांदीच्या किमतीत मोठी वाढ पाहायला मिळाली. ५ जूनचा वायदा असलेल्या सोन्याच्या किमतीत ४६९ रुपयांनी वाढून भाव १,५२,५५३ रुपयांवर पोहचला आहे. तर चांदी २१३५ रुपयांनी वधारली असून २,५५,४०० रुपयांवर पोहोचली आहे.

दरवाढीची प्रमुख कारणे

अमेरिका आणि इराणमधील तणाव कमी होऊन कराराची शक्यता निर्माण झाल्याने बाजारावर परिणाम झाला आहे.
जागतिक महागाई आणि आर्थिक अनिश्चिततेमुळे गुंतवणूकदार शेअर बाजाराऐवजी सोन्याला प्राधान्य देत आहेत.
जरी कच्च्या तेलाच्या किमती कमी झाल्या असल्या, तरी गुंतवणूकदारांमध्ये अजूनही पूर्णपणे खात्री नसल्याने सोन्याची मागणी कायम आहे.

भविष्यातील कल: काय सांगतायत तज्ज्ञ?

येणाऱ्या काळात लग्नसराईचा हंगाम सुरू होत असल्याने आणि गुंतवणूक वाढल्याने किमतींना आधार मिळत राहील. मात्र, अमेरिकन फेडरल रिझर्व्हने व्याज दरांबाबत काय भूमिका घेतली, यावर सोन्याची पुढची दिशा अवलंबून असेल. जर व्याजदरात कपात होण्याची शक्यता मावळली, तर सोन्यातील ही तेजी काही प्रमाणात मर्यादित राहू शकते.