“मुलांची फी कशी भरायची?” आठवड्याला ८ हजारांऐवजी मिळाले फक्त हजार रुपये; ई-कॅब चालकांची व्यथा!

नाव न सांगण्याच्या अटीवर एका चालकाने दावा केला की, कंपनीने दिलेल्या आश्वासनानुसार मिळायला हवी असलेली ८०७६ रुपयांची रक्कम मिळण्याऐवजी त्याला आठवड्याचा मोबदला म्हणून केवळ १०६४ रुपये मिळाले. “आम्हाला आमच्या मुलांची शाळेची फी भरायची असते, तसेच स्वयंपाकासाठी दूध आणि भाज्याही विकत घ्याव्या लागतात. कंपनीला हे समजत नाही का?” असा सवाल दुसऱ्या एका चालकाने केला. याबाबत द इंडियन एक्सप्रेसने वृत्त दिले आहे.

ग्रीन एसएमच्या प्रतिनिधीने इंडियन एक्स्प्रेसला सांगितले, “या प्रकारानंतर ग्रीन एसएम इंडियाच्या प्रतिनिधींनी त्यांच्या समस्या ऐकण्यासाठी, उपस्थित केलेल्या समस्यांचे निराकरण करण्यासाठी आणि एकत्रितपणे योग्य उपाय शोधण्यासाठी चालक भागीदारांशी तातडीने भेट घेतली आणि थेट चर्चा केली. ही चर्चा रचनात्मक झाली.”

अटी आणि शर्ती बदलल्या

कॅब चालकांचा दावा आहे की ग्रीन एसएमने दोन महिन्यांसाठी ३५००० रुपये प्रति महिना (किंवा महिन्यातील २६ दिवसांच्या कामासाठी दररोज १३४६रुपये) किमान उत्पन्न देण्याची हमी दिली आहे. या दोन महिन्यांनंतर उत्पन्न कामगिरी आणि प्रोत्साहनांवर आधारित होते, असा दावा त्यांनी केला.

किमान हमी उत्पन्नाचा लाभ घेण्यासाठी कंपनीने आता अतिरिक्त अटी लागू केल्याचा आरोप अनेक चालकांनी केला आहे. ‘द इंडियन एक्सप्रेस’ने पाहिलेल्या आणि कंपनीने चालकांना पाठवलेल्या एका मेसेजनुसार किमान व्यवसाय हमी उत्पन्नासाठीची पात्रता आता कामगिरीशी जोडण्यात आली आहे. यामध्ये किमान ९० टक्के बुकिंग स्वीकारण्याचा दर, किमान ९० टक्के राईड पुर्ण करण्याचा दर आणि ४.८ पेक्षा जास्त ग्राहक रेटिंग यांचा समावेश आहे.

चालकांना पाठवलेल्या या मेसेजमध्ये असे नमूद करण्यात आले होते की, केवळ या अटींची पूर्तता करणारे चालकच किमान हमी उत्पन्नासाठी पात्र असतील. अनेक चालकांनी असा दावा केला की, भरतीच्या वेळी त्यांना या अटींची माहिती देण्यात आली नव्हती.

“कंपनीने अजूनही दिल्ली आणि उत्तर प्रदेशमध्ये प्रवेश करण्यासाठी सर्व गाड्यांच्या परवानग्यांची व्यवस्था केलेली नाही. मग नोएडासाठी बुकिंग मिळाल्यास मी काय करायचे? मी ती रद्द करू शकत नाही, अन्यथा मला त्याचे पैसे मिळणार नाहीत आणि जर मी तिथे गेलो तर वाहतूक पोलीस मला पकडतील”, असे एका चालकाने सांगितले.