India-NZ FTA : ट्रम्प यांना भारताचा ‘दे धक्का’! न्यूझीलंडबरोबर मुक्त करार प्रत्यक्षात! कोणत्या वस्तूंची होणार आयात-निर्यात?

‘अशक्य’ वाटणारा करार अखेर प्रत्यक्षात!

पंतप्रधान नरेंद्र मोदी आणि पंतप्रधान लक्सन यांच्यात गेल्या वर्षी झालेल्या चर्चेनंतर या कराराच्या वाटाघाटींना वेग आला होता. “दशकांपासून अनेक लोक म्हणत होते की हा करार होऊ शकत नाही, पण आज त्यावर शिक्कामोर्तब होत आहे,” अशा शब्दांत पंतप्रधान लक्सन यांनी ‘X’ वर आपला आनंद व्यक्त केला. न्यूझीलंडच्या निर्यातदारांसाठी १.४ अब्ज लोकसंख्या असलेल्या भारताची बाजारपेठ खुली होणे हा एक मोठा टप्पा मानला जात आहे.

भारतीय निर्यातीला ‘सुवर्णसंधी’

केंद्रीय वाणिज्य आणि उद्योग मंत्री पियुष गोयल यांनी आग्र्यात न्यूझीलंडचे व्यापार मंत्री टोड मॅकले यांच्यासोबत या कराराची अधिकृत घोषणा केली. भारताकडून न्यूझीलंडला होणाऱ्या निर्यातीपैकी सुमारे ७०% वस्तूंना आता शुल्कमुक्त प्रवेश मिळेल. आग्र्यातील चर्मोद्योग, उत्तर प्रदेशातील हातमाग, हस्तकला आणि लाकडी कोरीव काम करणाऱ्या कारागिरांसाठी न्यूझीलंडमध्ये नवी कवाडे उघडतील.

भारत-न्यूझीलंड थेट विमानसेवा

न्यूझीलंडचे व्यापार मंत्री टोड मॅकले यांनी भारत-न्यूझीलंड संबंध सध्याच्या काळात सर्वात भक्कम असल्याचे सांगितले. या करारामुळे केवळ व्यापारच नाही, तर भारत आणि न्यूझीलंड दरम्यान थेट विमानसेवा सुरू होण्याचे संकेतही त्यांनी दिले आहेत. यामुळे दोन्ही देशांतील पर्यटन आणि लोकांतर्गत संबंध अधिक दृढ होतील.

या कराराचे ३ प्रमुख फायदे

• लघुउद्योग क्षेत्राचा विकास : लेदर, हँडलूम आणि हस्तकला क्षेत्रातील छोट्या उद्योजकांना जागतिक व्यासपीठ मिळेल.
• रोजगार निर्मिती : न्यूझीलंडमधील शेती आणि बागायत क्षेत्रातील उत्पादनांना भारतात बाजारपेठ मिळाल्यास तेथील रोजगारात वाढ होईल, तर भारतातील कारागिरांना कामाच्या नव्या संधी मिळतील.
• आर्थिक भागीदारी : जगातील तिसरी मोठी अर्थव्यवस्था होण्याच्या दिशेने वाटचाल करणाऱ्या भारतासाठी हा करार धोरणात्मकदृष्ट्या महत्त्वाचा आहे.