WPI Inflation Rate August 2026: अन्नधान्य, तेल अन् वीज महागली; घाऊक महागाईचा दर १० टक्क्यांच्या उंबरठ्यावर, पाहा नवी आकडेवारी!

अन्नपदार्थांच्या निर्देशांकातील महागाईचा दर जुलैमधील ६.६५ टक्क्यांवरून वाढून ऑगस्टमध्ये ७.०५ टक्क्यांवर गेला आहे. उत्पादित वस्तूंच्या बाबतीत, घाऊक किंमत निर्देशांकावर आधारित महागाईचा दर ८.३७ टक्क्यांच्या उच्चांकी पातळीवर पोहोचला असून, तो जुलैमध्ये ८.२९ टक्के होता.

इंधनामध्ये, खनिज-तेल महागाई ३२.४० टक्क्यांवरून ३८.४८ टक्क्यांवर पोहोचली, तर कच्च्या पेट्रोलियम आणि नैसर्गिक वायूची महागाई २६.९९ टक्क्यांवरून ३४.४१ टक्क्यांवर पोहोचली.

“ऑगस्ट २०२६ मध्ये पेट्रोलियम उत्पादने, खाद्यपदार्थ, खाद्यपदार्थांचे उत्पादन, मूलभूत धातूंचे उत्पादन, बिगर-खाद्य वस्तू आणि रसायने यांची महागाई वाढवण्यात प्रमुख भूमिका आहे”, असे वाणिज्य आणि उद्योग मंत्रालयाने घाऊक किंमत निर्देशांकाची आकडेवारी जाहीर करताना सांगितले.

या आर्थिक वर्षाच्या सुरुवातीपासून घाऊक किंमत निर्देशांक वाढत्या दिशेने वाटचाल करत आहे, कारण पश्चिम आशियातील युद्ध आणि त्यामुळे होर्मुझच्या सामुद्रधुनीतील नाकेबंदीमुळे जागतिक स्तरावर कच्च्या तेलाच्या आणि खतांच्या किमती वाढल्या, ज्याचा परिणाम अन्नधान्याच्या किमतींवर झाला.

रिझर्व्ह बँकेच्या पतधोरण समितीने, गेल्या महिन्यात, एल निनोच्या परिस्थितीमुळे नैऋत्य मान्सूनची कमतरता आणि असमानता असल्याचे कारण देत, रेपो दर ५.२५ टक्क्यांवर कायम ठेवला आणि आर्थिक वर्ष २०२७ साठी किरकोळ चलनवाढ ५ टक्के राहील असा अंदाज वर्तवला होता.

घाऊक किंमत निर्देशांक म्हणजे काय?

घाऊक किंमत निर्देशांक (WPI) हा वस्तू किरकोळ विक्रीच्या टप्प्यावर पोहोचण्यापूर्वीच्या त्यांच्या किमतींमधील बदलांचा मागोवा घेतो. त्यामुळे तो महागाई आणि आर्थिक कल दर्शवणारा एक महत्त्वाचा निर्देशांक ठरतो. विविध वस्तूंच्या किमतींमधील सुरुवातीच्या टप्प्यावरील बदलांवर लक्ष ठेवण्यासाठी अनेक देश अजूनही घाऊक किंमत निर्देशांकाचा वापर करतात. पुरवठा साखळीतील सुरुवातीच्या टप्प्यावरच खर्चाचा वाढता दबाव अधोरेखित करून, घाऊक किंमत निर्देशांक व्यवसायांना आणि सरकारांना महागाईचा अंदाज घेण्यास व त्याआधारे योग्य आर्थिक निर्णय घेण्यास मदत करतो.