Vaibhav Suryavanshi: १५ वर्षांच्या वैभव सूर्यवंशीला मिळालेल्या ५५ लाख आणि SUV कारवर सरकार किती टॅक्स वसूल करणार? पुण्यातील सीएने सांगितले गणित!

आयपीएलमधील या जबरदस्त कामगिरीमुळे वैभवने स्पर्धेतील विविध पुरस्कारांवर नाव कोरले. यामुळे त्याला बक्षीस म्हणून एकूण ५५ लाख रुपये आणि एक SUV कार मिळाली आहे. दरम्यान, वैभवला मिळालेल्या बक्षिसावर नव्या प्राप्तिकर कायद्यानुसार किती टॅक्स लागणार, याबाबत ‘लोकसत्ता ऑनलाईन’शी बोलताना पुण्यातील सीए. अनिरुद्ध राठी यांनी सविस्तर माहिती दिली आहे.

१६.५० लाख रुपये आधीच कापले जाणार

वैभव सूर्यवंशीला बक्षीस म्हणून मिळालेल्या ५५ लाखांवरील कराबाबत सीए. अनिरुद्ध राठी म्हणाले, “कायद्यातील तरतुदींनुसार, क्रीडा स्पर्धा किंवा गेम शोमध्ये मिळणाऱ्या अशा बक्षिसांच्या रकमेवर थेट ३०% फ्लॅट टॅक्स लागू होतो. यात कोणतीही मूळ सवलत (Basic Exemption) किंवा वजावट मिळत नाही. म्हणजेच, बीसीसीआय किंवा आयपीएल अथवा संबंधित संस्था/संघटना जेव्हा वैभवला हे ५५ लाख रुपये देईल, तेव्हा नवीन टीडीएस (TDS) नियमांनुसार ते स्वतः ३०% टीडीएस म्हणजेच १६.५० लाख रुपये आधीच कापून घेतील आणि उर्वरित ३८.५० लाख रुपये त्याच्या खात्यात जमा करतील.”

बक्षीस म्हणून मिळालेल्या कारवरही टॅक्स लागणार का?

“आता राहिला प्रश्न त्याला मिळालेल्या कारचा! तर कायद्यानुसार वस्तू स्वरूपात मिळणाऱ्या बक्षिसांवरील नियम स्पष्ट आहेत. कार जरी वस्तू स्वरूपात मिळाली असली, तरी त्या कारची बाजारातील जी खुली किंमत असेल, ती वैभवचे उत्पन्न मानली जाईल. त्या मूल्यावर सुद्धा वैभवला ३०% टॅक्स भरावा लागेल. हा टॅक्स रोखीने भरल्याचा किंवा बीसीसीआयने तो टीडीएस म्हणून जमा केल्याचा पुरावा दिल्याशिवाय ती गाडी डिलिव्हर करता येत नाही”, असे सीए. राठी यांनी वैभवला बक्षीस मिळालेल्या कारबाबत सांगितले.

“वैभवला मिळालेली बक्षिसांची रक्कम आणि कार या दोन्हीवर ३०% फ्लॅट टॅक्सवर लागू होणारा सेस (Cess) ४% जोडला जाईल. महत्त्वाची गोष्ट म्हणजे, वैभवची आयपीएलची एकूण कमाई (रिटेन्शन मानधन, मॅच फी आणि ही बक्षिसे) एकत्र केली तर ती सरचार्जच्या (Surcharge) मर्यादेत बसू शकते, ज्यामुळे त्याच्या एकूण टॅक्स उत्तरदायित्वात आणखी वाढ होईल”, असेही सीए. अनिरुद्ध राठी यांनी सांगितले.