डिलिव्हरी बॉईजसाठी ओला आणतेय स्वस्त इलेक्ट्रिक स्कूटर! व्यावसायिक अवतारात लाँच होणार Ola S1 Gen3

‘ARAI’ कडून व्यावसायिक विक्रीसाठी मंजुरी

‘ऑटोमोटिव्ह रिसर्च असोसिएशन ऑफ इंडिया’ कडून या स्कूटरला सेंट्रल मोटर व्हेइकल्स रूल्स अंतर्गत मंजुरी देण्यात आली आहे. भारतात कोणत्याही वाहनाची व्यावसायिक विक्री सुरू करण्यापूर्वी हे प्रमाणपत्र मिळवणे कायदेशीररीत्या बंधनकारक असते. हे प्रमाणपत्र मिळाल्यामुळे ओला इलेक्ट्रिक चालू तिमाहीतच ही स्कूटर बाजारात उतरवू शकते, अशी सूत्रांची माहिती आहे. ‘मनीकंट्रोल’च्या रिपोर्टनुसार ओला इलेक्ट्रिकने अद्याप यावर अधिकृत प्रतिक्रिया दिलेली नाही.

कशी असणार ओला स्कूटर?

२० फेब्रुवारी २०२६ रोजी जारी करण्यात आलेल्या सरकारी प्रमाणपत्रातील माहितीनुसार, ही ‘L1-कॅटेगरी’ मधील बॅटरीवर चालणारी स्कूटर असून, ती ‘ओला इलेक्ट्रिक टेक्नॉलॉजीज प्रायव्हेट लिमिटेड’ अंतर्गत नोंदणीकृत आहे. यामध्ये Ola S1 X Gen3 प्लॅटफॉर्मचे विविध प्रकार समाविष्ट आहेत, ज्यामध्ये 2 kWh, 3 kWh आणि 4 kWh अशा तीन बॅटऱ्यांचे पर्याय ग्राहकांना मिळणार आहे. स्कूटर AC PMSM मोटरद्वारे चालते, ज्याची पीक पॉवर आउटपुट ३.९३ kW आहे. तसेच ही स्कूटर चालक आणि सहप्रवासी अशा दोघांसाठी डिझाइन करण्यात आली आहे.

गिग वर्कर्ससाठी इलेक्ट्रिक दुचाकी का ठरतायत आकर्षक?

ओला इलेक्ट्रिकचे संस्थापक आणि चेअरमन भाविश अग्रवाल यांनी स्पष्ट केले की, इंधनाच्या वाढत्या दरांमुळे गिग वर्कर्सकडून इलेक्ट्रिक वाहनांची मागणी झपाट्याने वाढत आहे. क्विक कॉमर्स क्षेत्रात दुचाकींचा वापर प्रचंड वाढला आहे. अशा परिस्थितीत प्रत्येकजण कमी खर्चात चांगला पर्याय शोधत आहे.

सरकारी धोरणांचा फायदा

इलेक्ट्रिक वाहनांना प्रोत्साहन देण्यासाठी केंद्र सरकार प्रत्येक दुचाकी वाहनांवर अनुदान देत आहे. तसेच काही राज्य सरकारकडून देखील वाहनांना कर आणि सवलती मिळत आहे. उदाहरणार्थ, दिल्ली सरकारच्या ‘मसुदा इव्ही पॉलिसी २०२६’ मध्ये पुढील दोन वर्षांच्या आत नवीन पेट्रोल दुचाकींच्या नोंदणीवर पूर्णपणे बंदी घालण्याचा प्रस्ताव आहे. या धोरणामुळे सर्व डिलिव्हरी कंपन्या आणि ताफा चालवणाऱ्या ऑपरेटर्सना सक्तीने इलेक्ट्रिक वाहनांकडे वळावे लागणार आहे, ज्याचा थेट फायदा ओला सारख्या कंपन्यांना होईल.