Work life balance: “वर्क-लाईफ बॅलन्समधून यश मिळणार नाही”, नारायण मूर्तींनंतर कामाच्या तासांबाबत मराठी उद्योजिकेचे वक्तव्य चर्चेत

जेव्हा तुम्ही एखाद्या गोष्टीबाबत पॅशनेट…

एनडीटीव्ही मराठीला दिलेल्या मुलाखतीमध्ये कामाचे तास आणि वर्क-लाईफ बॅलन्सबाबत बोलताना रमा किर्लोस्कर म्हणाल्या, “मी स्वतः कामाच्या बाबतीत वर्कोहोलिक आहे. त्यामुळे प्रामाणिकपणे सांगायचे झाले तर मी वर्क-लाईफ बॅलन्सबाबत जास्त बोलू शकत नाही. कामच माझे आयुष्य आहे आणि ते मी एन्जॉय करते. जेव्हा तुम्ही एखाद्या गोष्टीबाबत पॅशनेट असता तेव्हा ते तुम्हाला काम वाटत नाही. पण मी जेव्हा माझ्या सहकाऱ्यांबरोबर बोलते, तेव्हा सांगते की काम पूर्ण होईल याची तुम्ही खात्री करायला पाहिजे.”

वर्क-लाईफ बॅलन्समधून यश मिळणार नाही

त्या पुढे म्हणाल्या, “जर तुम्हाला आयुष्यात कोणत्याही प्रकारचे यश मिळवायचे असेल तर ते वर्क-लाईफ बॅलन्समधून मिळणार नाही. तुम्ही यशस्वी लोक पहा, त्यांनी त्यांच्या कामासाठी खूप वेळ दिला आहे म्हणूनच ते अव्वल आहेत. मला वाटत नाही की, मायकेल फेल्प्स वर्क-लाईफ बॅलन्समुळे जगातील अव्वल क्रमांकाचा जलतरणपटू बनला आहे. त्याने यासाठी दिवसातील १०-१२ तास वेळ दिला असेल, ज्यामुळे त्याला त्याच्या क्षेत्रात यश मिळाले.”

एआय मुळे नोकऱ्या जाणार

एआयचा नोकऱ्यांवर होणाऱ्या संभाव्य परिणामांबद्दल बोलताना रमा किर्लोस्कर म्हणाल्या, “एआयमुळे नोकऱ्या जाणार आहेत. त्यामुळे लोकांना स्किल अपग्रेडेशन करावे लागणार आहे. आपण कारखान्यातील शॉप फ्लोअरचे उदाहरण घेऊया. पारंपरिक लेथ मशिनिंगमध्ये, ठराविक अनुभव असलेला ऑपरेटर हे काम हाताळतो. मात्र, आता सीएनसी तंत्रज्ञानामुळे ऑपरेटरला कंट्रोलर प्रोग्रामिंग आणि जॉब सेटअपची कामेही करावी लागतात, ज्यासाठी अधिक कौशल्याची आवश्यकता असते आणि याच गोष्टीवरून मोठी चर्चा किंवा वाद निर्माण झाला आहे.”

नारायण मूर्ती काय म्हणाले होते?

२०२४ मध्ये सीएनबीसी-टीव्ही१८ ग्लोबल लीडरशिप समिट’ मध्ये बोलताना नारायण मूर्ती यांनी नमूद केले होते की, भारताच्या आर्थिक विकासासाठी कठोर परिश्रम आणि समर्पण अत्यंत महत्त्वाचे आहे आणि देशाच्या प्रगतीत योगदान देण्यासाठी भारतीयांनी आठवड्याला ७० तास काम केले पाहिजे. “सुमारे २५ वर्षांपूर्वी एका कार्यक्रमात के. व्ही. कामथ यांना वर्क-लाइफ बॅलन्सबद्दल त्यांचे मत विचारण्यात आले होते. तेव्हा ते म्हणाले होते की, भारत हा अनेक आव्हाने असलेला गरीब देश आहे. आपल्याला आधी स्थिरता आणि प्रगती करावी लागेल, त्यानंतरच आपण वर्क-लाइफ बॅलन्सचा विचार करू शकतो,” असे मूर्ती यांनी सांगितले. कामथ हे जिओ फायनान्शियल सर्व्हिसेसचे अध्यक्ष आहेत.