RCB Brand Value : केवळ २ IPL जिंकणाऱ्या RCB ची ब्रँड व्हॅल्यू २८०० कोटींच्या पुढे! पाच वेळचे विजेते मुंबई, चेन्नईला टाकले मागे!

हूलिहान लोकीच्या २०२६ च्या आयपीएल ब्रँड मूल्यमापन अहवालानुसार, आयपीएलचे व्यावसायिक मूल्य वार्षिक ११.४ टक्क्यांनी वाढून २०.६ अब्ज डॉलर्सवर पोहोचले आहे, तर त्याचे स्वतंत्र ब्रँड मूल्य १०.३ टक्क्यांनी वाढून ४.३ अब्ज डॉलर्स झाले आहे. या वाढीच्या सातत्यामुळे जगातील सर्वाधिक मौल्यवान क्रीडा मालमत्तांमध्ये आयपीएलचे स्थान अधिक भक्कम झाले आहे.

३१२ दशलक्ष डॉलर्स इतके ब्रँड मूल्य नोंदवत आरसीबीने (RCB) लीगची सर्वाधिक मूल्य असलेली फ्रँचायझी म्हणून आपले स्थान कायम राखले आहे आणि ३०० दशलक्ष डॉलर्सचा टप्पा ओलांडणारा पहिला आयपीएल संघ बनला आहे. ही महत्त्वपूर्ण कामगिरी अशा वर्षी साध्य झाली आहे ज्या वर्षी या फ्रँचायझीची मालकी १.७८ अब्ज डॉलर्सच्या विक्रमी व्यवहाराद्वारे हस्तांतरित झाली आहे. कोणत्याही आयपीएल संघाला मिळालेले हे आतापर्यंतचे सर्वाधिक मूल्य आहे.

या अहवालात असे म्हटले आहे की, लीगचे विक्रमी मूल्यमापन आणि आरसीबीचे (RCB) विक्रमी मूल्यमापन हे दोन महत्त्वाचे टप्पे क्रिकेटकडे पाहण्याच्या गुंतवणूकदारांच्या दृष्टिकोनातील बदलाचे निदर्शक आहेत. फ्रँचायझींचे मूल्यमापन आता केवळ त्यांच्या मैदानांवरील कामगिरीच्या आधारावरच केले जात नाही, तर माध्यमांतून निश्चित महसूल मिळवण्याची क्षमता, वर्षभर चाहत्यांशी संबंध टिकवून ठेवण्याची क्षमता आणि क्रीडा व मनोरंजन क्षेत्रातील व्यवसायांमध्ये विस्तार करण्याची क्षमता यांसारख्या बाबींचाही त्यात विचार केला जात आहे.

“आयपीएल जागतिक क्रीडाविश्वाची नव्याने व्याख्या करत असल्याने, २०२६ मध्ये क्रिकेटचे जागतिक मालकीच्या आणि संस्थात्मक पाठबळ असलेल्या मालमत्ता वर्गात रूपांतर होण्याच्या प्रक्रियेला आणखी गती मिळाली आहे”, असे हौलिहान लोकीच्या वित्तीय आणि मूल्यांकन सल्लागार व्यवसायाचे संचालक हर्ष तालिकोटी म्हणाले.

दुसऱ्या स्थानी मुंबई इंडियन्स कायम

दरम्यान, मुंबई इंडियन्स २६४ दशलक्ष डॉलर्ससह दुसऱ्या स्थानावर कायम आहे. त्यानंतर कोलकाता नाइट रायडर्स (२४५ दशलक्ष डॉलर्स) आणि चेन्नई सुपर किंग्स (२४४ दशलक्ष डॉलर्स) यांचा क्रमांक लागतो.