तुकाराम मुंढे यांच्यानंतर FSSAI आक्रमक; स्विगी इन्स्टामार्टला ९ नोटिसा, तुम्ही अन्न मागवत असाल तर सावधान!

एफएसएसएआयच्या नोटीसमध्ये काय आहे?

एफएसएसएआयने इंस्टामार्टला पाठवलेल्या नोटीसमध्ये ग्राहकांना मुदत संपलेले, खराब झालेले, सडलेले आणि दूषित अन्नपदार्थ पुरवल्याचा गंभीर ठपका कंपनीवर ठेवण्यात आला आहे. धक्कादायक बाब म्हणजे, ग्राहकांनी तक्रार करूनही कंपनीने त्यावर कोणतीही ठोस पावले किंवा कारवाई केली नाही, उलट काही ग्राहकांना फक्त परतावा देऊन अन्न सुरक्षेच्या मूळ समस्येकडे दुर्लक्ष केल्याचे समोर आले आहे.

‘या’ ब्रँड्सचे खराब आणि मुदत संपलेले पदार्थ विकले

अक्षयकल्प ऑरगॅनिक अंडी या कंपनीची अंडी फक्त मुदत संपलेली नव्हती तर त्यातून दुर्गंधी येत होता. तर हेल्थिफाय १००% व्हे प्रोटीन आणि मॉईस मद्रास मिक्स्चर ही उत्पादने त्यांची एक्सपायरी डेट संपल्यानंतरही ग्राहकांना डिलिव्हर करण्यात आली. काक्के दा पराठावरुन मागवलेले अन्नपदार्थ सडलेले होते आणि त्यातून तीव्र दुर्गंधी येत होती. धक्कादायक म्हणजे लहान मुलांचे दुधाचे अन्न अत्यंत निकृष्ट आणि असुरक्षित स्थितीत आढळले. अयोग्य साठवणुकीमुळे हे उत्पादन खराब झाले होते, आणि ग्राहकाने ते परत केल्यानंतरही कंपनीने तेच खराब उत्पादन पुन्हा दुसऱ्या ग्राहकाला पाठवल्याचा आरोप आहे. याशिवाय, प्लॅटफॉर्मवर ‘नोईस एग्स’ हे उत्पादन अशा ब्रँड नावाने विकले जात होते, ज्याचा उल्लेख एफएसएसएआय लायसन्सवर नव्हता.

पुढील कायदेशीर पावले

एफएसएसएआयने स्विगी इन्स्टामार्टला या सर्व त्रुटींवर लेखी स्पष्टीकरण आणि दस्तऐवजीकरण पुरावे सादर करण्याचे आदेश दिले आहेत. तसेच, अशा घटना पुन्हा घडू नयेत म्हणून कंपनीने काय उपाययोजना केल्या, याचा ‘अनुपालन अहवाल’ मागवला आहे.

FSSAI समोरील कायदेशीर पेच

एफएसएसएआय अधिकारी म्हणाले, “बहुतांश ग्राहक सोशल मीडिया किंवा आमच्या ॲपवर फोटोंसह तक्रार करतात. आम्ही त्याची दखल घेऊन कंपन्यांना नोटिसा पाठवतो. थेट कायदेशीर कारवाई करण्यासाठी सरकारी यंत्रणेकडून अन्नपदार्थांचे ‘कायदेशीर नमुने’ गोळा करावे लागतात, जे राज्यांच्या अन्न व औषध प्रशासनामार्फत गोळा केले जात आहेत. आम्ही अशा ब्रँड्सची नावे सोशल मीडियावर उघड करत आहोत, ज्यामुळे त्यांच्या कॉर्पोरेट प्रतिमेला फटका बसतो, परिणामी कंपन्या तातडीने सुधारणा करण्यास तयार होतात.”