TATA: टाटा समूहातील वाद थेट धर्मादाय आयुक्तांकडे! वेणू श्रीनिवासन यांचे खळबळजनक पत्र; नोएल टाटांच्या अडचणी वाढणार?

वेणू श्रीनिवासन यांनी “ट्रस्ट्सच्या कामकाजात गंभीर प्रशासकीय त्रुटी” असल्याचा आरोप केला असून, धर्मादाय ट्रस्ट आणि त्याच्या विश्वस्तांचा टाटा सन्सच्या व्यावसायिक बाबींमधील सहभागाबद्दल चिंता व्यक्त केली आहे. याबाबत इकॉनॉमिक टाईम्सने वृत्त दिले आहे. याचबरोबर धर्मादाय आयुक्तांना लिहिलेल्या पत्राची प्रत पाहिल्याचा उल्लेखही या वृत्तात आहे.

धर्मादाय आयुक्तांना लिहिलेल्या एका पत्रात, श्रीनिवासन यांनी नोएल टाटा यांची कायमस्वरूपी विश्वस्त म्हणून नियुक्ती आणि त्यांचे पद कायम ठेवण्यावर, टाटा ट्रस्ट्सच्या अध्यक्षपदाच्या आधारावर, मुलगा नेव्हिल यांच्या नियुक्तीवर आणि निर्णय प्रक्रियेतून स्वतःला वगळण्यावर प्रश्नचिन्ह उपस्थित केले आहे. याशिवाय, टाटा सन्सच्या धोरणात्मक आणि व्यावसायिक बाबींमध्ये सर दोराबजी टाटा ट्रस्ट आणि त्याच्या विश्वस्तांच्या सहभागावरही त्यांनी प्रश्नचिन्ह उपस्थित केले आहे. नोएल टाटा हे ट्रस्ट्सचे अध्यक्ष आहेत.

टाटा सन्समधील महत्त्वाचे भागधारक आणि प्रशासकीय कारभार या मुद्द्यांवरून टाटा ट्रस्ट्समधील संघर्षात यामुळे मोठी वाढ झाली आहे. समूहाची होल्डिंग कंपनी असलेल्या टाटा सन्समध्ये टाटा ट्रस्ट्सची ६६% मालकी आहे. यापैकी, सर दोराबजी टाटा ट्रस्टकडे टाटा सन्सचा २७.९८% हिस्सा आहे, तर सर रतन टाटा ट्रस्टकडे २३.५६% हिस्सा आहे. या दोन्ही ट्रस्ट्सची मिळून एकूण मालकी ५१.५४% इतकी होते.

श्रीनिवासन यांनी उपस्थित केलेली एक प्रमुख चिंता म्हणजे टाटा सन्सच्या व्यावसायिक निर्णयांमध्ये टाटा ट्रस्ट्सचा वाढता सहभाग. टाटा सन्सच्या आयपीओला पर्याय शोधण्याबाबतच्या ट्रस्ट्सच्या १७ सप्टेंबरच्या निवेदनाचा आणि शापूरजी पालोनजी ग्रुपला तरलता पुरवण्याबाबतच्या नोएल टाटा यांच्या प्रस्तावाचा संदर्भ देत ते म्हणाले की, ट्रस्ट्सनी “टाटा सन्सशी संबंधित महत्त्वपूर्ण व्यावसायिक व्यवहार, वाटाघाटी करणे आणि त्यांची अंमलबजावणी करून घेण्यात थेट भूमिका स्वीकारली आहे.”

श्रीनिवासन यांनी पत्रात म्हटले आहे की, अशा प्रकारचा सहभाग सर दोराबजी टाटा ट्रस्टच्या धर्मादाय उद्दिष्टांशी विसंगत होता आणि त्यामुळे संस्थेचा कर-सवलतीचा दर्जा तसेच धर्मादाय निधी धोक्यात येऊ शकला असता.

…कदापि स्वीकारार्ह नाही

वेणू श्रीनिवासन यांनी धर्मादाय आयुक्तांना लिहिलेल्या पत्रात आक्षेप नोंदवता म्हटले, “टाटा सन्स प्रायव्हेट लिमिटेडच्या व्यावसायिक आणि धोरणात्मक कामकाजात सर दोराबजी टाटा ट्रस्ट आणि टाटा ट्रस्ट्सचा वाढता सहभाग ही अत्यंत चिंतेची बाब आहे. सर दोराबजी टाटा ट्रस्ट हा एक सार्वजनिक धर्मादाय ट्रस्ट आहे. टाटा सन्समध्ये त्यांची मोठी हिस्सेदारी असली, तरी त्याआधारे या ट्रस्टने स्वतःच एखाद्या व्यावसायिक संस्थेची कार्ये करणे किंवा टाटा सन्सच्या व्यावसायिक कामकाजात थेट सहभाग घेणे कदापि स्वीकारार्ह ठरू शकत नाही.”