मार्व्हलच्या लोकप्रिय सुपरव्हिलन ‘डॉक्टर डूम’पासून प्रेरित TVS Raider Super Squad Edition चे नवीन मॉडेल टीव्हीएस मोटर कंपनीने सादर केले आहे. तरुण ग्राहकांना लक्षात घेऊन तयार करण्यात आलेल्या या मोटरसायकलमध्ये आकर्षक डिझाइन, अत्याधुनिक कनेक्टिव्हिटी फीचर्स आणि दमदार परफॉर्मन्सचा संगम साधण्यात आला आहे. या नव्या मॉडेलची किंमत दिल्लीतील एक्स-शोरूमनुसार ९५,३२० रुपये ठेवण्यात आली असून, लवकरच देशभरातील अधिकृत टीव्हीएस डीलरशिपवर ती उपलब्ध होणार आहे.
या नव्या एडिशनमध्ये स्पेक्ट्रल ग्रीन हा आकर्षक रंग देण्यात आला असून, विशेष मल्टी-टोन ट्रॅव्हल फिनिशमुळे रंग हिरव्या छटेतून तपकिरी छटेकडे बदलताना दिसतो. मार्व्हलमधील डॉक्टर डूमच्या प्रभावी व्यक्तिमत्त्वाला साजेसा हा लूक तयार करण्यात आला आहे. त्यामुळे स्टायलिश आणि वेगळी ओळख असलेली मोटरसायकल शोधणाऱ्या तरुणांसाठी हा पर्याय अधिक आकर्षक ठरणार आहे.
या व्हेरिएंटच्या अनावरणासाठी टीव्हीएसने वेगळी मार्केटिंग रणनीती अवलंबली. भारतातील निवडक चित्रपटगृहांमध्ये प्रदर्शित झालेल्या ‘Spider-Man: Brand New Day’ या चित्रपटाच्या पोस्ट-क्रेडिट सीक्वेन्सनंतर अचानक या नव्या मोटरसायकलची झलक दाखवण्यात आली. मार्व्हलच्या पोस्ट-क्रेडिट परंपरेचा वापर करून ग्राहकांना आश्चर्याचा धक्का देण्याचा हा प्रयत्न होता.
TVS Raider Super Squad Edition मध्ये १२५ सीसी सेगमेंटमधील लोकप्रिय थ्री-व्हॉल्व्ह इंजिन देण्यात आले आहे. याशिवाय Connected Reverse LCD Cluster द्वारे ८५ हून अधिक कनेक्टेड फीचर्स, iGO Assist तंत्रज्ञानामुळे अधिक चांगले अॅक्सिलरेशन आणि सहज राइडिंगचा अनुभव मिळतो. रुंद टायरमुळे रस्त्यावर अधिक स्थिरता मिळते, तर टॉप व्हेरिएंटमध्ये ड्युअल डिस्क ब्रेक्स आणि सिंगल-चॅनल ABS देण्यात आले असून, त्यामुळे सुरक्षिततेलाही प्राधान्य देण्यात आले आहे.
टीव्हीएसने २०२३ मध्ये Iron Man आणि Black Panther या मार्व्हल पात्रांवर आधारित Super Squad Edition सादर करत भारतातील पहिली मार्व्हल-थीम मोटरसायकल लॉन्च केली होती. त्यानंतर २०२५ मध्ये Deadpool आणि Wolverine या थीमवर आधारित एडिशन्सही आणण्यात आल्या. आता Doctor Doom प्रेरित मॉडेलद्वारे या सहकार्याला आणखी विस्तार देण्यात आला असून, स्टायलिश डिझाइन, आधुनिक तंत्रज्ञान आणि मनोरंजनाचा संगम ग्राहकांना अनुभवायला मिळणार आहे.
कनेक्टेड रिव्हर्स एलसीडी क्लस्टर म्हणजे काय?
कनेक्टेड रिव्हर्स एलसीडी क्लस्टर हा एक आधुनिक डिजिटल डॅशबोर्ड आहे. यात गडद पार्श्वभूमीवर चमकदार, लखलखणारी अक्षरे असतात आणि ब्लूटूथ कनेक्टिव्हिटीद्वारे थेट डिस्प्लेवर स्मार्ट अलर्ट, नेव्हिगेशन आणि प्रवासाची आकडेवारी दिली जाते.
iGO Assist म्हणजे काय?
iGO Assist हे टीव्हीएस मोटर कंपनीने ज्युपिटर स्कूटर आणि रायडर १२५ सारख्या आपल्या दुचाकी वाहनांसाठी विकसित केलेले एक मायक्रो-हायब्रीड तंत्रज्ञान आहे. यामध्ये इंटिग्रेटेड स्टार्टर जनरेटर (ISG) आणि स्टार्ट-स्टॉप सिस्टीम आहे, ज्यामुळे इंजिन व्यवस्थित सुरू होते आणि इंधनाची कार्यक्षमता सुधारते.
Doctor Doom प्रेरित TVS Raider Super Squad Edition ची वैशिष्ठ्ये
- नवीन स्पेक्ट्रल रंगासह मल्टी-टोन फिनिश.
- १२५ सीसीचे थ्री-व्हॉल्व्ह इंजिन.
- Connected Reverse LCD Cluster मध्ये ८५ पेक्षा अधिक कनेक्टेड फीचर्स.
- iGO Assist तंत्रज्ञानामुळे सुधारित अॅक्सिलरेशन आणि सहज राइडिंग.
- रुंद टायर, टॉप व्हेरिएंटमध्ये ड्युअल डिस्क ब्रेक्स आणि सिंगल-चॅनल ABS.
- ‘Spider-Man: Brand New Day’ चित्रपटाच्या पोस्ट-क्रेडिट सीक्वेन्समध्ये अनोखे अनावरण.
- किंमत ९५३२० रुपये (दिल्ली एक्स-शोरूम).
- लवकरच देशभरातील अधिकृत टीव्हीएस डीलरशिपमध्ये उपलब्ध.
