“माझ्याकडून १४ हजार कोटी वसूल केले मग न्याय कुठेय?” विजय मल्ल्यांचे गंभीर आरोप; म्हणाले, “माझे मित्र…”

एक्सवरील एका पोस्टमध्ये मल्ल्या यांनी ‘इकॉनॉमिक टाइम्स’मधील एका वृत्ताचा संदर्भ दिला आहे. या वृत्तानुसार, माध्यम क्षेत्रातील दिग्गज सुभाष चंद्रा हे आयबीसी (IBC) अंतर्गत २२,००६.५७ कोटी रुपयांचे कर्जदारांचे दावे निकाली काढण्यासाठी ६.५ कोटी रुपये भरणार आहेत.

आपल्या पोस्टमध्ये मल्ल्या यांनी लिहिले, “जर ही बातमी खरी असेल, तर माझे मित्र सुभाष यांचे खूप-खूप अभिनंदन. ६,२०३ कोटी रुपयांच्या न्यायालयीन देय रकमेपोटी माझ्याकडून १४,१०० कोटी रुपये वसूल केल्याचे बँका आणि सरकारने मान्य केले आहे. इतर अनेक कर्जदारांनी मूळ रकमेच्या तुलनेत खूपच कमी रक्कम भरून आपली प्रकरणे मिटवली आहेत. यालाच कदाचित ‘भारतीय कर्ज निवारण न्याय’ म्हणत असावेत. यावर प्रसारमाध्यमांकडून मात्र कोणतेही प्रश्न विचारले जात नाहीत.”

डिसेंबर २०२५ मध्ये विजय मल्ल्या यांनी आपल्याकडून वसूल केलेल्या रकमेबाबत सरकार आणि सार्वजनिक क्षेत्रातील बँकांकडून दिल्या जाणाऱ्या विसंगत विधानांवर प्रश्नचिन्ह उपस्थित केले होते आणि या प्रकरणाच्या चौकशीसाठी निवृत्त न्यायाधीशांची नियुक्ती करण्याची मागणी केली होती. सरकार आणि बँका संसदेत तसेच जनतेसमोर परस्परविरोधी आकडेवारी सादर करत असल्याचे मल्ल्या यांनी म्हटले होते.

सोशल मीडियावरील एका पोस्टमध्ये त्यांनी म्हटले होते की, “केंद्र सरकार आणि सार्वजनिक क्षेत्रातील बँका मला व जनतेला आणखी किती काळ फसवणार आहेत? अर्थमंत्री संसदेत सांगतात की माझ्याकडून १४,१०० कोटी रुपये वसूल करण्यात आले आहेत, तर बँका म्हणतात की १०,००० कोटी रुपये वसूल झाले आहेत. मग या ४,००० कोटी रुपयांच्या फरकाचे काय?”

त्यांनी पुढे निदर्शनास आणून दिले की, राज्यमंत्र्यांनी संसदेत सांगितले आहे की त्यांच्याकडे अजूनही १०,००० कोटी रुपये देणे बाकी आहे, तर बँकांचा दावा आहे की हे देणे ७,००० कोटी रुपये इतकेच आहे.

“वसूल केलेल्या रकमेबाबत कोणताही खाते तपशील किंवा जमा नोंदवलेली नाही”, असे सांगत त्यांनी या हिशोबाबाबत स्पष्टता असणे आवश्यक असल्याचे नमूद केले होते. प्रत्यक्ष आकडेवारीची पडताळणी करण्यासाठी स्वतंत्र चौकशीची गरज असल्याचे मत माल्या यांनी व्यक्त केले होते.