Investment Tips : PPF, EPF की VPF? अधिक परतावा आणि टॅक्स वाचवण्यासाठी कोणता पर्याय सर्वोत्तम?

व्याजदर आणि परताव्यातील फरक

• गुंतवणूक करताना सर्वात आधी विचार होतो तो व्याजाचा. सध्याच्या आकडेवारीनुसार, ईपीएफ आणि व्हीपीएफने बाजी मारली आहे.
• पीपीएफ : सार्वजनिक भविष्य निर्वाह निधीवर सध्या ७.१ टक्के वार्षिक व्याज मिळत आहे. एप्रिल ते जून २०२६ या तिमाहीसाठी सरकारने यात कोणताही बदल केलेला नाही.
• ईपीएफ आणि व्हीपीएफ : कर्मचारी भविष्य निर्वाह निधी आणि ऐच्छिक भविष्य निर्वाह निधीवर आर्थिक वर्ष २०२५-२६ साठी ८.२५ टक्के व्याज निश्चित करण्यात आले आहे.
• ईपीएफमध्ये कर्मचारी आणि नियोक्ता दोघांचे योगदान असते. तर व्हीपीएफमध्ये तुम्ही तुमच्या मूळ पगाराच्या १०० टक्क्यांपर्यंत अतिरिक्त गुंतवणूक करू शकता. पीपीएफच्या तुलनेत ईपीएफमध्ये १.१५ टक्के जास्त व्याज मिळत असल्याने दीर्घकाळात मोठा फंड तयार होण्यास मदत होते.

कर सवलत आणि ‘EEE’ दर्जा

• या तिन्ही योजना जुन्या कर प्रणालीनुसार कलम ८०सी अंतर्गत १.५ लाख रुपयांपर्यंत कर सवलत देतात. या योजना ‘EEE’ (Exempt-Exempt-Exempt) श्रेणीत येतात, म्हणजेच गुंतवणूक, व्याज आणि मॅच्युरिटीवर मिळणारी रक्कम करमुक्त असते.
• पीपीएफमध्ये मिळणारे व्याज आणि रक्कम पूर्णपणे करमुक्त असते. तर ईपीएफ आणि व्हीपीएफमध्ये जर कर्मचाऱ्याचे वार्षिक योगदान २.५ लाख रुपयांपेक्षा जास्त असेल, तर त्यावरील व्याजावर टॅक्स द्यावा लागू शकतो. मात्र, ५ वर्षे सलग नोकरी केल्यानंतर पैसे काढल्यास ते करमुक्त असतात.

लॉक-इन आणि पैसे काढण्याचे नियम

तवणुकीचा कालावधी हा गुंतवणूकदारांसाठी महत्त्वाचा मुद्दा असतो. पीपीएफ या योजनेचा कालावधी १५ वर्षांचा असतो. सातव्या वर्षापासून काही अटींवर अंशतः पैसे काढता येतात. शिस्तबद्ध बचतीसाठी हा सर्वोत्तम पर्याय आहे. दुसरीकडे ईपीएफ आणि व्हीपीएफ या योजना तुमच्या नोकरीशी जोडलेल्या आहेत. नोकरी सोडल्यास किंवा निवृत्तीनंतर पूर्ण रक्कम काढता येते. घर खरेदी, लग्न किंवा आजारपण यांसारख्या कारणांसाठी निवृत्तीपूर्वीही काही रक्कम काढण्याची सोय यात उपलब्ध आहे.

तुमच्यासाठी चांगला पर्याय कोणता?

जर तुम्ही नोकरी करत असाल, तर प्रथम ईपीएफचा फायदा घ्या आणि अतिरिक्त बचतीसाठी व्हीपीएफला प्राधान्य द्या, कारण तिथे व्याजदर जास्त आहे. ज्यांच्याकडे ईपीएफची सुविधा नाही, त्यांच्यासाठी पीपीएफ हा सर्वात सुरक्षित आणि करमुक्त परतावा देणारा पर्याय आहे. अनेक तज्ज्ञ दोन्हीचा समन्वय साधण्याचा सल्ला देतात. व्हीपीएफमधून जास्त परतावा आणि पीपीएफमधून पूर्णपणे करमुक्त मॅच्युरिटी असे दुहेरी फायदे मिळवता येतात.