निफ्टी-सेन्सेक्सची वाढ म्हणजेच सगळा बाजार वाढतो असे नाही!

‘एसआयपी’च्या माध्यमातून पैसे गुंतवणे कायमच श्रेयस्कर म्हटले जात असले तरीही त्यातून मोठा परतावा मिळवण्यासाठी प्रतीक्षा करावी लागते. शेअर बाजारात घसरण झाली आणि फंड योजनेची एनएव्ही खाली आली की आपल्याला जास्त युनिट मिळतात म्हणजेच व्यापार चक्रातील घसरणीचा काळ असेल तो ‘एसआयपी’च्या माध्यमातून गुंतवणूक करणाऱ्यांसाठी बेगमीचा काळ असतो. या वेळेला अधिक पैसे गुंतवून जास्तीत जास्त युनिट जमा करायचे असतात. कमी किमतीत युनिट घेऊन ठेवले की त्याचा फायदा बाजार वर गेल्यावर होतो. तुम्ही दिलेल्या माहितीनुसार, २०२२ या वर्षानंतर आजच्या तारखेपर्यंत अशी स्थिती आलेली जाणवत नाही. किंबहुना बाजार पडतील, झडतील असे वाटत असतानाच अचानकपणे ते सावरतात आणि वरच्या दिशेला जातात. त्यामुळे तुम्हाला समाधानकारक परतावे मिळाले नसावेत.

तुमची गुंतवणूक संपूर्ण इक्विटी फंडात नसून काही अग्रेसिव्ह हायब्रिड फंडामध्ये सुद्धा आहे. ज्यामध्ये मुळातच शुद्ध इक्विटी फंडांपेक्षा परतावा कमी मिळतो. तुमचा पोर्टफोलिओ मध्यम ते दीर्घकाळपर्यंत पैसे गुंतवत राहून त्यानंतर मिळणारे परतावे अनुभवण्याचा अशा पद्धतीचा आखलेला असेल तर अवघ्या तीन वर्षांत परतावा मिळत नाही अशी तक्रार करणे हेच मुळी योग्य आहे असे मला वाटत नाही. म्युच्युअल फंडातील गुंतवणुका संपत्ती निर्मितीसाठी करायच्या असतील तर त्यासाठी संपत्ती संचय होईल एवढा कालावधीसुद्धा मिळायला हवा. तुमच्या पोर्टफोलिओमध्ये एकही मिडकॅप फंड नसल्याने मागच्या तीन वर्षांत मिडकॅपमध्ये आलेल्या तेजीमध्ये तुमची गुंतवणूकच नव्हती. याचाही तुमच्या पोर्टफोलिओवर थोडासा परिणाम नक्कीच झालेला आहे.

गेल्या तीन महिन्यांपासून आंतरराष्ट्रीय बाजारात जी अभूतपूर्व अस्थिरता सुरू आहे आणि अशाश्वत वातावरण आहे त्याचा विचार करता बाजारांनी दिलेले परतावे हे समाधानकारक आहेत, असे म्हणावे लागेल. अमेरिका-चीन यांच्यातील व्यापार युद्ध, रशिया आणि युक्रेन यांच्यातील तणाव, इस्रायल आणि इराण यांच्यातील वाढता संघर्ष, भारत- पाकिस्तान यांच्यातील ताणले गेलेले संबंध एवढे घडूनसुद्धा बाजार ८५,००० च्या दिशेने वाटचाल करत आहे. निफ्टी आणि सेन्सेक्स वाढत आहेत म्हणजेच सगळा बाजार वाढतो आहे असेही नाही. यामुळे तुम्ही फंडातील गुंतवणूक आहे तशीच ठेवून शक्य झाल्यास ‘फ्लेक्झीकॅप’ प्रकाराच्या फंडात गुंतवणूक सुरू करावी. अर्थातच त्यावेळेला तुमच्या अन्य फंडांना हात न लावता गुंतवणूक सुरू ठेवावी.

आणखी पाच वर्षे थांबल्यास मध्ये एखादी घसरणीची वेळ आली तर तुमच्या ‘एसआयपी’तून मिळणारे परतावे निश्चितच चांगले असतील. मात्र अशी घसरण आली नाही आणि बाजार दर वार्षिक दहा ते बारा टक्के दराने वाढले तरीही तुमच्या ‘एसआयपी’चे परतावे चांगलेच असणार आहेत. तुम्ही विचारलेल्या प्रश्नातून सर्वसामान्य गुंतवणूकदारांसाठी एक मोलाचा मंत्र मिळालेला आहे तो म्हणजे – दीर्घकालीन गुंतवणुकीसाठी ‘एसआयपी’चा वापर केल्यास त्याची फळे मिळण्यासाठी किमान पाच ते सात वर्षे थांबण्याची तयारी असायला हवी!