Private Bank Loan Growth : देशातील खासगी बँकिंग क्षेत्र हे कर्ज वितरणातील भक्कम वाढीबाबत आशावादी असून, किरकोळ, औद्योगिक व सेवा क्षेत्रातील कर्जाची मागणी सातत्यपूर्ण असेल, असा अंदाज फिक्की-आयबीए बँकर्स सर्वेक्षणात वर्तविण्यात आला आहे. हा अंदाज खासगी क्षेत्रातील बँकांसाठी सकारात्मक मानला जात आहे.

खासगी बँका जुलै ते डिसेंबर या कालावधीतील कर्ज वितरणातील वाढीबाबत अधिक सकारात्मक आहेत. दर दहापैकी नऊ बँकांनी मध्यम ते उच्च वाढ नोंदविण्याची अपेक्षा व्यक्त केली आहे. सर्वच खासगी बँकांना कर्ज वितरणात दोन आकडी वाढ नोंदविणे अपेक्षित आहे. याचवेळी सार्वजनिक क्षेत्रातील बँकांही कर्ज वितरणाबाबत सकारात्मक असून, तीन चतुर्थांश सार्वजनिक बँकांनाही एवढीच वाढ अपेक्षित आहे. परकीय बँकांना कर्ज वितरणात दोन आकडीपेक्षा कमी वाढ अपेक्षित आहे. संपूर्ण बँकिंग क्षेत्राचा विचार करता कर्ज वितरणाची स्थिती भक्कम राहील, असे सर्वेक्षणात म्हटले आहे.

बँकिंग क्षेत्रातील मालमत्तेच्या गुणवत्तेत सुधारणा होत असून, भांडवलाची उपलब्धताही चांगली आहे. किरकोळ, लघु व मध्यम उद्योगांना कर्ज वितरणात सातत्यपूर्ण वाढ सुरू आहे. यामुळे खासगी क्षेत्रातील भांडवली विस्ताराचे व्यापक पातळीवर पुनरूज्जीवन होण्याची चिन्हे दिसत आहेत, असे सर्वेक्षणात स्पष्ट करण्यात आले आहे. चालू आर्थिक वर्षातील पहिल्या तिमाहीत देशाचा विकास दर ७.८ टक्के नोंदविण्यात आला आहे. याचवेळी एकूण मूल्यवर्धन ८.२ टक्के असून, गुंतवणुकीतही वाढ होत आहे. या पार्श्वभूमीवर हे सर्वेक्षण करण्यात आले.

किरकोळ, एसएमई कर्जात मोठी वाढ

किरकोळ आणि लघु व मध्यम उद्योग या दोन क्षेत्रांतील कर्जांमध्ये मोठी वाढ होत आहे. सर्वेक्षणात सहभागी झालेल्यांपैकी ८० टक्के बँकांनी या कर्जात गेल्या वर्षीच्या तुलनेत दोन आकडी वाढ होण्याचा अंदाज वर्तविला आहे. याचबरोबर औद्योगिक कर्जांची मागणीही कायम राहण्याची शक्यता आहे, असे सर्वेक्षणात नमूद करण्यात आले आहे.

आरबीआयकडून रेपो दरात वाढ

भारतीय रिझर्व्ह बँकेने ७ ऑक्टोबर २०२६ रोजी जाहीर केलेल्या पतधोरण बैठकीत रेपो दरात २५ बेसिस पॉइंट्सची वाढ केली आहे, ज्यामुळे नवा रेपो दर ५.५० टक्के झाला आहे. महागाई नियंत्रण आणण्यासाठी आरबीआयने हा निर्णय घेतला आहे. मात्र, निर्णयामुळे कर्ज महाग होते. याचा परिणाम चालू वर्षात कर्ज घेण्यावर होऊ शकतो.