मंदीतही आयपीओ बाजारात तेजीचा धडाका! ‘सेबी’कडून आणखी तीन कंपन्यांना निधी उभारणीसाठी मंजुरी

सेबीने २६ आणि २७ मे २०२६ रोजी या कंपन्यांना त्यांचे निरीक्षण पत्र दिले आहे. सेबीच्या भाषेत ‘निरीक्षण पत्र’ मिळणे म्हणजेच आयपीओ आणण्यासाठी अधिकृत मंजुरी मिळणे होय. हे तिन्ही आयपीओ ‘बीएसई’ आणि ‘एनएसई’वर सूचिबद्ध होणार आहेत.

१. रोडेक फार्मा (Rodec Pharma)

हा आयपीओ पूर्णपणे ‘ऑफर फॉर सेल’ (OFS) स्वरूपाचा असेल. यामध्ये प्रवर्तक मुकेश कुमार गुप्ता यांच्याकडून ५६.५ लाख समभागांची विक्री केली जाईल. त्यामुळे या विक्रीतून मिळणारा सर्व निधी थेट प्रवर्तकांकडे जाईल, कंपनीला कोणताही निधी मिळणार नाही.

व्यवसाय: १९९७ मध्ये स्थापन झालेली ही कंपनी पशुखाद्य पूरक उत्पादने आणि पशुवैद्यकीय औषधांची निर्मिती व विक्री करते. कंपनीचा मुख्य उत्पादन प्रकल्प उत्तर प्रदेशातील गाझियाबाद येथे आहे.

२. रेनी स्ट्रिप्स लिमिटेड (Renny Strips)

कंपनी या आयपीओअंतर्गत ३०० कोटी रुपयांचे नवीन समभाग जारी करणार आहे. याशिवाय प्रवर्तकांकडून १.२ कोटी समभागांची ‘ऑफर फॉर सेल’ (OFS) याद्वारे विक्री केली जाईल. नवीन समभाग विक्रीतून मिळणारा निधी लुधियाना येथे स्कॅफोल्डिंग, फॉर्मवर्क सिस्टीम आणि ईआरडब्ल्यू पाइप्सच्या नवीन प्रकल्पासाठी वापरला जाईल. तसेच जुन्या प्रकल्पांचे आधुनिकीकरण आणि कर्जफेडीसाठी हा पैसा वापरण्यात येईल.

व्यवसाय: ही कंपनी माइल्ड स्टील बिलेट्स, वायर रॉड्स आणि डिझाइन-ड्रिव्हन स्कॅफोल्डिंगसारखी स्ट्रक्चरल उत्पादने तयार करते.

३. कृष्णा बिल्डस्पेस (Krishna Buildspace)

गुजरातस्थित या बांधकाम कंपनीच्या आयपीओमध्ये ९० लाख नवीन समभाग विक्री केले जातील. सोबतच मोहनभाई चनाभाई सोरठिया आणि जयंतीभाई चनाभाई सोरठिया यांच्याकडून ९ लाख समभागांची ‘ऑफर फॉर सेल’अंतर्गत विक्री केली जाईल.

व्यवसाय: १९९५ मध्ये स्थापन झालेल्या या कंत्राटदार आणि इमारत सेवा पुरवठादार कंपनीने गेल्या दशकात ६३९.२ कोटी रुपये मूल्याचे ८२ प्रकल्प यशस्वीरित्या पूर्ण केले असून सुमारे २३ लाख चौरस फूट बांधकाम क्षेत्र विकसित केले आहे.