बाजारातील मंदीची झळ; एअरटेल-रिलायन्ससह सात कंपन्यांचे मूल्य १.१३ लाख कोटींनी घटले

गेल्या आठवड्यात मुंबई शेअर बाजाराचा निर्देशांक सेन्सेक्स २७६.३२ अंशांनी म्हणजेच ०.३५ टक्क्यांनी घसरला. राष्ट्रीय शेअर बाजाराचा निफ्टी ७६.३५ अंशांनी म्हणजेच ०.३१ टक्क्यांनी खाली आला. जागतिक व्याजदरांबाबतची चिंता, भू-राजकीय अनिश्चितता आणि बाजारातील नव्या ‘क्लोजिंग ऑक्शन’ सत्रामुळे निर्माण झालेली अस्थिरता यांचा गुंतवणूकदारांच्या भावनेवर परिणाम झाला. त्यामुळे बाजाराने गेल्या आठवड्यात सावध पवित्रा घेतला, असे रिलिगेअर ब्रोकिंगचे वरिष्ठ उपाध्यक्ष (संशोधन) अजित मिश्रा यांनी सांगितले.

एअरटेल, रिलायन्सला सर्वाधिक फटका

देशातील सर्वाधिक मूल्यवान कंपन्यांमध्ये दुसऱ्या क्रमांकावर असलेल्या भारती एअरटेलच्या बाजारमूल्यात तब्बल ४०,५००.८५ कोटी रुपयांची घट झाली. आठवडाअखेरीस कंपनीचे बाजारमूल्य ११.७४ लाख कोटी रुपये राहिले. रिलायन्स इंडस्ट्रीजच्या बाजारमूल्यात ४०,०५६.३२ कोटी रुपयांची घट झाली. त्यामुळे कंपनीचे बाजारमूल्य १७.३८ लाख कोटी रुपये राहिले. बाजारमूल्यानुसार रिलायन्स इंडस्ट्रीजने आपले अव्वल स्थान कायम राखले.

एचडीएफसी बँक, बजाज फायनान्सही घसरले

खासगी क्षेत्रातील आघाडीची बँक असलेल्या एचडीएफसी बँकेच्या बाजारमूल्यात ११,५५८.३५ कोटी रुपयांची घट झाली. त्यामुळे बँकेचे बाजारमूल्य ११.०९ लाख कोटी रुपये राहिले. बजाज फायनान्सच्या बाजारमूल्यात १०,०८६.०५ कोटी रुपयांची घट झाली. कंपनीचे बाजारमूल्य आठवडाअखेरीस ६.७० लाख कोटी रुपये होते. याशिवाय लार्सन अँड टुब्रोचे बाजारमूल्य ६,४७३.४५ कोटी रुपयांनी, तर भारतीय आयुर्विमा महामंडळाच्या (एलआयसी) बाजारमूल्यात ३,१६२.५० कोटी रुपयांची घट झाली.

हिंदुस्तान युनिलिव्हरचे बाजारमूल्यही १,५५०.७३ कोटी रुपयांनी कमी झाले. आठवडाअखेरीस कंपनीचे बाजारमूल्य ४.७२ लाख कोटी रुपये राहिले. टीसीएस, आयसीआयसीआय बँक, एसबीआयची कामगिरी सकारात्मक बाजारातील एकूण नकारात्मक वातावरणाच्या पार्श्वभूमीवर आघाडीच्या तीन कंपन्यांच्या बाजारमूल्यात मात्र वाढ झाली. टाटा कन्सल्टन्सी सर्व्हिसेसच्या (टीसीएस) बाजारमूल्यात १६,६४३.२० कोटी रुपयांची वाढ झाली. त्यामुळे कंपनीचे बाजारमूल्य ८.४८ लाख कोटी रुपये झाले. आयसीआयसीआय बँकेचे बाजारमूल्य ४,४७५.२८ कोटी रुपयांनी वाढून १०.२२ लाख कोटी रुपये झाले. तर स्टेट बँक ऑफ इंडियाच्या बाजारमूल्यात ५९९.९९ कोटी रुपयांची वाढ झाली. एसबीआयचे बाजारमूल्य आठवडाअखेरीस ९.६५ लाख कोटी रुपये राहिले.

सलग तिसऱ्या आठवड्यात बाजारावर दबाव

गेल्या आठवड्यात शुक्रवारी बाजारात जोरदार सुधारणा झाली. जागतिक तंत्रज्ञान कंपन्यांकडून मिळालेल्या सकारात्मक संकेतांमुळे माहिती-तंत्रज्ञान कंपन्यांच्या समभागांमध्ये जोरदार खरेदी झाली. त्याचा फायदा बाजाराला झाला. मात्र ही सुधारणा असूनही सेन्सेक्स आणि निफ्टी सलग तिसऱ्या आठवड्यात दबावाखाली राहिले. जागतिक व्याजदरांचे भवितव्य, भू-राजकीय परिस्थिती आणि देशांतर्गत बाजारातील नव्या ‘क्लोजिंग ऑक्शन’ प्रक्रियेबाबतची अस्थिरता यामुळे गुंतवणूकदार सावध राहिले.

रिलायन्स अव्वल, एअरटेल दुसऱ्या क्रमांकावर

बाजारमूल्यानुसार कंपन्यांच्या क्रमवारीत रिलायन्स इंडस्ट्रीज पहिल्या स्थानावर आहे. त्यानंतर भारती एअरटेल, एचडीएफसी बँक, आयसीआयसीआय बँक, स्टेट बँक, टीसीएस, बजाज फायनान्स, लार्सन अँड टुब्रो, एलआयसी आणि हिंदुस्तान युनिलिव्हर यांचा क्रमांक आहे.