भारतीय उद्योगविश्वात मोठे फेरबदल; ‘निफ्टी ५०’ ची पकड सैल!

वृत्तसंस्थेच्या विश्लेषणानुसार, देशातील सर्व सूचिबद्ध कंपन्यांच्या एकत्रित समायोजित निव्वळ नफ्यात निफ्टी ५० कंपन्यांचा वाटा मार्च तिमाहीत ४७.१ टक्क्यांवर आला. वर्षभरापूर्वी हा वाटा ५१.८ टक्के होता, तर डिसेंबर २०२५ तिमाहीत तो ४९.८ टक्के होता. डिसेंबर २०२२ तिमाहीत हा वाटा सर्वोच्च ५८.३ टक्क्यांवर पोहोचला होता.

मार्च तिमाहीत निफ्टी ५० कंपन्यांच्या समायोजित निव्वळ नफ्यात केवळ ४.५ टक्क्यांची वार्षिक वाढ झाली. सलग आठव्या तिमाहीत या कंपन्यांच्या नफावाढीचा दर एक अंकी राहिला आहे. याउलट, ३,०८१ सूचिबद्ध कंपन्यांच्या एकत्रित समायोजित नफ्यात १५.१ टक्क्यांची वाढ नोंदविण्यात आली.

निफ्टी ५० कंपन्यांचा एकत्रित समायोजित निव्वळ नफा २.२३ लाख कोटी रुपयांवर पोहोचला असला तरी व्यापक कॉर्पोरेट क्षेत्राचा नफा अधिक वेगाने वाढल्याने त्यांचा एकूण वाटा कमी झाला. विशेष म्हणजे बँकिंग, वित्तीय सेवा आणि विमा (बीएफएसआय) तसेच तेल-गॅस क्षेत्र वगळल्यास निफ्टी ५० कंपन्यांच्या नफ्यातील वाढ केवळ २.७ टक्क्यांपर्यंत मर्यादित राहिली.

तथापि, महसुलाच्या बाबतीत निफ्टी ५० कंपन्यांची कामगिरी तुलनेने चांगली राहिली. त्यांच्या एकत्रित विक्रीत ११.४ टक्क्यांची वाढ झाली, जी गेल्या १२ तिमाहींतील सर्वोच्च वाढ मानली जाते. त्यामुळे सर्व सूचिबद्ध कंपन्यांच्या एकत्रित महसुलातील त्यांचा वाटा ४४ टक्क्यांवर पोहोचला आहे. पाच वर्षांपूर्वी हा वाटा ४२.१ टक्के होता.

विश्लेषकांच्या मते, बँकिंग, एफएमसीजी आणि माहिती-तंत्रज्ञान (आयटी) क्षेत्रातील मंदावलेली वाढ ही निफ्टी ५० कंपन्यांच्या कमकुवत नफावाढीमागील प्रमुख कारणे आहेत. दुसरीकडे, मध्यम आणि लघु भांडवली कंपन्यांनी तुलनेने अधिक वेगाने वाढ नोंदवत गुंतवणूकदारांचे लक्ष वेधून घेतले आहे.

ठळक मुद्दे

• निफ्टी ५० कंपन्यांचा नफ्यातील वाटा ४७.१ टक्क्यांवर घसरला
• २१ तिमाहींतील ही सर्वात नीचांकी पातळी
• निफ्टी ५० नफावाढ फक्त ४.५ टक्के; व्यापक बाजारातील कंपन्यांची वाढ १५.१ टक्के
• महसूल वाढ मात्र ११.४ टक्के राहून १२ तिमाहींच्या उच्चांकावर
• बीएफएसआय, एफएमसीजी आणि आयटी क्षेत्रातील मंदीचा मोठ्या कंपन्यांवर परिणाम