Share Market: गुंतवणूकदारांच्या संपत्तीत ८.२३ लाख कोटींची विक्रमी भर! मुंबई शेअर बाजारात ४ दिवसांत नेमकं काय घडलं?

सेन्सेक्समधील या तेजीला हातभार लावणाऱ्या प्रमुख कंपन्यांमध्ये एचडीएफसी बँक, रिलायन्स इंडस्ट्रीज, आयसीआयसीआय बँक, महिंद्रा अँड महिंद्रा, भारती एअरटेल, भारत इलेक्ट्रॉनिक्स लिमिटेड, लार्सन अँड टुब्रो, इटरनल आणि सन फार्मास्युटिकल इंडस्ट्रीज यांचा समावेश होता.

गुंतवणूकदारांच्या संपत्तीत ८ लाख कोटींची भर

बाजारातील या तेजीमुळे गुंतवणूकदारांच्या संपत्तीत मोठी वाढ झाली. या सत्रादरम्यान बीएसईवर सूचीबद्ध कंपन्यांचे एकत्रित बाजार भांडवल सुमारे २.१३ लाख कोटी रुपयांनी वाढून ४८२.३३ लाख कोटी रुपयांवर पोहोचले. गेल्या चार ट्रेडिंग सत्रांमध्ये, गुंतवणूकदारांच्या संपत्तीत एकत्रितपणे सुमारे ८.२३ लाख कोटी रुपयांची भर पडली आहे.

भारतातील खाजगी क्षेत्रातील सर्वात मोठी बँक असलेल्या एचडीएफसी बँकच्या शेअर्सनी ३.६ टक्क्यांची वाढ नोंदवली. बँकेने जून तिमाहीत आपल्या एकूण कर्जांच्या वितरणात १५.४ टक्क्यांची वाढ झाल्याचे जाहीर केल्यानंतर ही तेजी दिसून आली. सोमवारी निफ्टी ५० निर्देशांकात झालेली वाढ प्रामुख्याने याच बँकेच्या योगदानामुळे झाली.

याचबरोबर शुक्रवारी १,३५५ कोटी रुपयांची विदेशी गुंतवणूक झाल्यामुळे गुंतवणूकदारांचा आत्मविश्वास वाढला आहे. तसेच कच्च्या तेलाच्या किमती प्रति बॅरल ७२ डॉलरच्या खाली येणे, फॉरेन करन्सी नॉन-रेसिडेंट ठेवींमधून अपेक्षित असलेला निधी आणि जागतिक स्तरावर ‘एआय’ क्षेत्रातील व्यापाराचा वेग मंदावणे या गोष्टींमुळे विदेशी गुंतवणूकदार भारतीय बाजारात खरेदीकडे वळण्याची शक्यता आहे, असे मत जिओजित इन्व्हेस्टमेंट्सचे मुख्य गुंतवणूक रणनीतीकार व्ही. के. विजयकुमार यांनी व्यक्त केले.

“जागतिक स्तरावर संमिश्र संकेत असूनही, कच्च्या तेलाच्या स्थिर किमतींमुळे भारतीय शेअर बाजारात सकारात्मक कल दिसून आला. कच्च्या तेलाच्या किमतींमधील सातत्यपूर्ण मंदीमुळे महागाई, चालू खात्यातील शिल्लक, तेल कंपन्यांचा नफा आणि एकूण स्थूल आर्थिक स्थिरतेला आधार मिळेल. जागतिक स्तरावर, एआय कंपन्यांच्या शेअर्समधील नफावसुलीचा जागतिक बाजारावर परिणाम झाला”, असे जिओजित इन्व्हेस्टमेंट्स लिमिटेडचे संशोधन प्रमुख विनोद नायर यांनी म्हटले.