टाटा सन्सच्या लिस्टिंगला नोएल टाटांचा ‘आरबीआय’कडे तीव्र विरोध; बातमी येताच ‘या’ कंपनीचा शेअर ३% घसरला!

आरबीआयचा नियम आणि नोएल टाटांचा विरोध का?

भारतीय रिझर्व्ह बँकेने टाटा सन्सला एका ‘मुख्य गुंतवणूक कंपनी’च्या रूपात देशातील अव्वल १५ मोठ्या गैर बँकिंग वित्तीय कंपन्यांच्या श्रेणीत टाकले आहे. आरबीआयच्या नियमांनुसार या श्रेणीतील कंपन्यांना शेअर बाजारात सूचीबद्ध करणे बंधनकारक आहे. मात्र, नोएल टाटा यांनी आरबीआय आणि प्रमुख सरकारी भागधारकांना पाठवलेल्या पत्रात म्हटले आहे की, टाटा सन्सच्या लिस्टिंगमुळे टाटा समूहाच्या होल्डिंग कंपनीच्या मूळ दीर्घकालीन स्वरूपाला धक्का पोहोचू शकतो. तसेच टाटा ट्रस्ट्सच्या परोपकारी आणि सामाजिक उद्देशांना खीळ बसू शकते.

बाजाराच्या दबावाची भीती

टाटा ट्रस्ट्सने आरबीआयकडे आपली बाजू मांडताना सांगितले आहे की, टाटा सन्सने नेहमीच व्यवसाय आणि धोरणात्मक क्षेत्रांमध्ये दीर्घकालीन भांडवल गुंतवण्यावर भर दिला आहे. जर कंपनी शेअर बाजारात लिस्ट झाली, तर तिला दर तिमाहीच्या आर्थिक निकालांचे दडपण सहन करावे लागेल. शेअर बाजारातील चढउतार आणि गुंतवणूकदारांच्या अपेक्षांना सामोरे जावे लागेल. सार्वजनिक भागधारकांच्या तात्कालिक मागण्या पूर्ण कराव्या लागतील.

टाटा केमिकल्सचा शेअर का कोसळला?

टाटा सन्सच्या लिस्टिंगच्या विरोधाचा थेट फटका ‘टाटा केमिकल्स’च्या शेअर्सना बसला. आजच्या व्यवहारात टाटा केमिकल्सचा शेअर ३ टक्क्यांनी घसरून ७३५.५० रुपयांवर बंद झाला. टाटा केमिकल्सकडे टाटा सन्सची सुमारे ३ टक्के इक्विटी भागीदारी आहे. टाटा मोटर्स किंवा टाटा स्टीलच्या तुलनेत टाटा केमिकल्सचे स्वतःचे स्वतंत्र मार्केट कॅप कमी आहे. त्यामुळे टाटा सन्स मधील तिची ३% भागीदारी तिच्या एकूण मूल्यांकनाचा एक प्रचंड मोठा हिस्सा आहे. विश्लेषकांच्या मते, टाटा केमिकल्सकडे असलेल्या टाटा सन्सच्या या ३% भागीदारीचे मूल्य तब्बल २१,००० कोटी रुपये आहे, जे टाटा केमिकल्सच्या सध्याच्या एकूण मार्केट कॅपपेक्षाही जास्त आहे.

जर टाटा सन्सची बाजारात लिस्टिंग झाली असती, तर टाटा केमिकल्सच्या या संपत्तीचे मूल्य उघड होऊन तिच्या शेअर्समध्ये तेजी येण्याची शक्यता होती. मात्र, लिस्टिंगला विरोध झाल्यामुळे गुंतवणूकदारांनी शेअर्सची विक्री केल्याने बाजारात घसरण पाहायला मिळाली.