Vedanta Limited shares : देशातील अब्जाधीश उद्योगपती अनिल अग्रवाल यांच्या ‘वेदांता लिमिटेड’ या दिग्गज खाणकाम कंपनीच्या कार्यालयांवर अंमलबजावणी संचालनालय अर्थात ईडीने छापे टाकल्याची बातमी समोर आली आहे. या बातमीचा थेट फटका कंपनीच्या शेअर्सना बसला. आज मंगळवारी, २ जून २०२६ रोजी वेदांताचा शेअर त्याच्या आजच्या दिवसातील सर्वोच्च पातळीवरून ४ टक्क्यांपेक्षा जास्त घसरला. केंद्रीय तपास यंत्रणेच्या या कारवाईमुळे शेअर बाजारात वेदांताच्या शेअर्समध्ये मोठी विक्री पाहायला मिळाली.
काय आहे नेमकं प्रकरण?
पीटीआयच्या अहवालानुसार, वित्तीय गुन्ह्यांचा तपास करणाऱ्या ईडीने वेदांता समूहाशी संबंधित वेगवेगळ्या ठिकाणांवर हे छापे टाकले आहेत. ‘फॉरेन एक्स्चेंज मॅनेजमेंट अॅक्ट’ म्हणजेच फेमा कायद्याच्या उल्लंघनाचा तपास करण्यासाठी ही शोधमोहीम राबवली जात असल्याचे सूत्रांनी सांगितले. सोमवारपासून सुरू झालेल्या या कारवाईत दिल्ली, राजस्थान आणि इतर काही ठिकाणांचा समावेश आहे.
वेदांताच्या प्रवक्त्याचे स्पष्टीकरण
ईडीच्या या कारवाईला वेदांताच्या प्रवक्त्यांनी दुजोरा दिला आहे. “कंपनी तपास यंत्रणांना पूर्ण सहकार्य करत असून त्यांनी मागितलेली सर्व माहिती पुरवली जात आहे,” असे प्रवक्त्यांनी स्पष्ट केले. तसेच, कंपनी सर्व लागू असलेले कायदे आणि नियमांचे पालन करण्यासाठी वचनबद्ध असून, सध्या ही बाब नियामक प्रक्रियेत असल्याने यावर अधिक टिप्पणी करणे शक्य नसल्याचे कंपनीने म्हटले आहे.
शेअर बाजार उघडताच वाढला दबाव
आज सकाळी वेदांताचा शेअर तेजीसह उघडला होता. मात्र, ईडीच्या छाप्यांची बातमी येताच गुंतवणूकदारांनी शेअर्स विक्रीचा सपाटा लावला. परिणामी शेअर लाल निशाण्यावर घसरला. दिवसातील उच्चांक ३४३.५० रुपयांवरुन शेअर ३२८.३० रुपयांच्या नीचांकी पातळीवर घसरला आहे.
शेअर्सच्या ट्रेडिंग व्हॉल्युममध्ये मोठी वाढ
आज वेदांताच्या शेअर्समध्ये पॅनिक सेलिंग पाहायला मिळाले. दुपारी १२.३० वाजेपर्यंतच्या आकडेवारीनुसार, बाजारात वेदांताच्या २२.७७ लाख शेअर्सची खरेदी-विक्री झाली होती. वेदांताचा गेल्या दोन आठवड्यांचा सरासरी दैनंदिन व्हॉल्युम १४.०४ लाख शेअर्सचा आहे, ज्याच्या तुलनेत आज दुपारपर्यंतच प्रचंड मोठ्या प्रमाणात शेअर्सची उलाढाल झाली. जेव्हा शेअर्स खरेदीविक्रीची संख्या सामान्यापेक्षा वाढते, तेव्हा मोठे गुंतवणूकदार बाहेर पडत असल्याचे संकेत मानले जातात.
गेल्याच आठवड्यात मिळाले होते ‘AA’ रेटिंग
विशेष म्हणजे, गेल्याच आठवड्यात वेदांता समूहाला रेटिंग एजन्सी ‘ICRA’ कडून मोठा दिलासा मिळाला होता. आयसीआरएने समूहातील प्रमुख कंपन्यांचे लाँग-टर्म रेटिंग अपग्रेड करून ते ‘AA’ केले होते. गेल्या दशकभरातील हे कंपनीचे सर्वोच्च देशांतर्गत क्रेडिट रेटिंग ठरले आहे. ‘AA’ रेटिंग असलेल्या कंपन्या त्यांच्या वित्तीय जबाबदाऱ्या वेळेवर फेडण्याच्या बाबतीत अत्यंत सुरक्षित मानल्या जातात आणि तिथे क्रेडिट जोखीम खूप कमी असते.
वेदांताचा दीर्घकालीन परतावा अजूनही मजबूत
भारतीय शेअर बाजारातील सध्याच्या चढ-उताराच्या काळातही, नुकत्याच डिमर्जर झालेल्या वेदांता लिमिटेडने आपल्या गुंतवणूकदारांना बंपर परतावा दिला आहे. बीएसईच्या आकडेवारीनुसार गेल्या ६ महिन्यांत या शेअरमध्ये ७१% इतकी मोठी वाढ झाली आहे. तर वर्षात शेअर ५३ टक्क्यांनी वधारला. गेल्या पाच वर्षांचा विचार केला तर शेअरने २३३% इतका मल्टिबॅगर परतावा दिला आहे.
