'प्रमोशन' पाहिजे असेल तर AI वापरल्याचे सिद्ध करावे लागणार; 'या' प्रसिद्ध आयटी कंपनीचा नवा नियम ठरतोय चर्चेचा विषय

Accenture AI Tools Use Mandatory For Promotion: हे धोरण ज्युली स्वीट यांनी २०२५ मध्ये दिलेल्या त्याच इशाऱ्याचे पुढचे पाऊल आहे, ज्यामध्ये त्यांनी म्हटले होते की, जे कर्मचारी एआय आधारित कामासाठी स्वतःची कौशल्ये विकसित करण्यास तयार नाहीत, त्यांना संस्थेमध्ये मोठ्या संधी मिळवण्यासाठी कमी वाव आहे.

Accenture AI promotion policy for employees ceo Julie Sweet

जे कर्मचारी कंपनीच्या अंतर्गत एआय सिस्टिम्सचा सक्रियपणे वापर करणार नाहीत, त्यांना कारकिर्दीत प्रगती करणे आणि वरिष्ठ पदांपर्यंत पोहोचणे कठीण जाऊ शकते. (Photo: Reuters/AI Modified)

Accenture AI promotion policy for employees: कृत्रिम बुद्धिमत्ता (एआय) क्षेत्रात सातत्याने होत चाललेल्या प्रगतीमुळे जगभरातील विविध क्षेत्रातील कर्मचाऱ्यांना नोकरी जाण्याची चिंता भेडसावत आहे. अशात माहिती तंत्रज्ञान (आयटी) क्षेत्रातील आघाडीची कंपनी एक्सेंचरच्या अध्यक्षा आणि मुख्य कार्यकारी अधिकारी ज्युली स्वीट यांनी पदोन्नतीसाठी (प्रमोशन) एआय टूल्सचा वापर करणे बंधनकारक केले आहे.

कर्मचाऱ्यांना संदेश

फेब्रुवारी २०२६ मध्ये लागू करण्यात आलेल्या या धोरणातून कंपनीने एक स्पष्ट संदेश दिला आहे की, जे कर्मचारी कंपनीच्या अंतर्गत एआय सिस्टिम्सचा सक्रियपणे वापर करणार नाहीत, त्यांना कारकिर्दीत प्रगती करणे आणि वरिष्ठ पदांपर्यंत पोहोचणे कठीण जाऊ शकते.

एआय हेच आमच्या कामाचे स्वरूप

विविध माध्यमांनी दिलेल्या वृत्तानुसार, अलीकडील एका पॉडकास्टमध्ये बोलताना ज्युली स्वीट यांनी यावर भर दिला की, एआय आता कंपनीच्या कामकाजाचा अविभाज्य भाग बनले आहे. त्या म्हणाल्या, “आज एक्सेंचरमध्ये एआय हेच आमच्या कामाचे स्वरूप आहे.”

ज्या कर्मचाऱ्यांना पदोन्नती हवी आहे, त्यांनी कंपनीच्या कार्यपद्धतीला दिशा देणाऱ्या या एआय टूल्सचा स्वीकार करणे आवश्यक असल्याचेही त्यांनी पुढे नमूद केले.

बढतीसाठी एआय टूल्सचा वापर सिद्ध करावा लागणार

या नवीन धोरणांतर्गत, पदोन्नतीच्या चर्चेदरम्यान एक्सेंचरच्या स्वतःच्या मालकीच्या एआय प्लॅटफॉर्म्सचा कर्मचाऱ्यांनी केलेला नियमित वापर विचारात घेतला जाईल. अनेक प्रसारमाध्यमांनी दिलेल्या अंतर्गत वृत्तानुसार, जर व्यवस्थापक आणि सहाय्यक संचालकांना वरिष्ठ पदांवर जायचे असेल, तर त्यांनी एआय टूल्सचा सातत्याने वापर केल्याचे सिद्ध करावे लागेल.

एआयच्या वापरावर एचआर विभागाची देखरेख

एचआर विभाग एआय रिफायनरी सारख्या प्लॅटफॉर्मवरील कर्मचाऱ्यांच्या सहभागावर लक्ष ठेवत असल्याचे वृत्त आहे. यामध्ये एआयचा वापर किती वेळा केला जातो आणि दैनंदिन कामात त्याचा प्रत्यक्ष उपयोग कसा होतो, याचा प्रामुख्याने विचार केला जात आहे. कर्मचारी केवळ एआय तंत्रज्ञानाशी परिचितच नसावेत, तर त्यांनी ते सक्रियपणे ग्राहकांचे प्रकल्प आणि अंतर्गत प्रक्रियेत समाविष्ट करावे, हा या धोरणाचा मुख्य उद्देश आहे.

हेही वाचा

Warren Buffett: युद्धाच्या काळात कोसळणाऱ्या शेअर बाजारात पैसे कसे वाचवायचे? वॉरेन बफे यांची “७०/३०” संकल्पना ठरत आहे मार्गदर्शक

या धोरणामागचा तर्क

जगभरात सुमारे ८,००,००० कर्मचारी असलेल्या एक्सेंचरचा एआय-आधारित कामाकडे वळण्याचा निर्णय, वेगाने बदलणाऱ्या सल्लागार (कन्सल्टिंग) क्षेत्रात आपली स्पर्धात्मकता टिकवून ठेवण्यासाठी उचललेले एक धोरणात्मक पाऊल आहे.

हे धोरण ज्युली स्वीट यांनी २०२५ मध्ये दिलेल्या त्याच इशाऱ्याचे पुढचे पाऊल आहे, ज्यामध्ये त्यांनी म्हटले होते की, जे कर्मचारी एआय आधारित कामासाठी स्वतःची कौशल्ये विकसित करण्यास तयार नाहीत, त्यांना संस्थेमध्ये मोठ्या संधी मिळवण्यासाठी कमी वाव आहे.