Amazon Web Services: इराणच्या हल्ल्यांदरम्यान यूएईमधील अमेझॉनच्या डेटा सेंटरला आग; हवाई हल्ल्यामुळेच आग लागली का हे अद्याप अस्पष्ट

ही घटना अमेरिका-इस्रायल आणि इराणमधील लष्करी संघर्षाशी संबंधित आहे की नाही हे स्पष्ट नसले तरी, इराणचे सर्वोच्च नेते अयातुल्ला अली खामेनी आणि इतर वरिष्ठ अधिकाऱ्यांच्या मृत्यूचा बदला घेण्यासाठी इराणने यूएईवरील हल्ल्यादरम्यान ही घटना घडली असावी, अशी शक्यता व्यक्त केली जात आहे.

रॉयटर्सच्या वृत्तानुसार, डेटा सेंटरमधील घटना सध्याच्या युद्धसंबंधित हवाई हल्ल्यांशी संबंधित होती की नाही याची कंपनीने अद्याप पुष्टी किंवा खंडन केलेले नाही.

अमेझॉन वेब सर्व्हिसेसने सांगितले की ही घटना रविवारी दुबईतील वेळेनुसार दुपारी ४:३० च्या सुमारास घडली, असे त्यांच्या हेल्थ डॅशबोर्डवरील पोस्टमध्ये म्हटले आहे.

“आमचे एक डेटा सेंटर त्यावर आदळलेल्या अज्ञात वस्तूमुळे प्रभावित झाले आहे, ज्यामुळे आग लागली”, असे कंपनीने म्हटले.

अमेरिका-इस्रायलने संयुक्तपणे केलेल्या हल्ल्यामुळे इराणने यावर आक्रमक प्रत्युत्तर द्यायला सुरुवात केली आहे. इराणने मध्य पूर्वेमध्ये यूएई, कतार, कुवेत आणि सौदी अरेबियासह या प्रदेशातील अमेरिकन तळांवर आणि मित्र राष्ट्रांवर क्षेपणास्त्र आणि ड्रोन हल्ल्यांचा मारा सुरू केला आहे.

कौन्सिल ऑन फॉरेन रिलेशन्समध्ये चीन आणि उदयोन्मुख तंत्रज्ञानाचे वरिष्ठ फेलो असलेले क्रिस मॅकगुअर यांनी एक्सवर एका पोस्टमध्ये लिहिले, “रॉयटर्सच्या वृत्तानुसार, यूएईमधील एका AWS डेटा सेंटरवर एक वस्तू आदळली, ज्यामुळे आग लागली आणि ते बंद पडले. हा इराणी ड्रोन हल्ला होता असे गृहीत धरले, तर एखाद्या संघर्षात व्यावसायिक डेटा सेंटरला प्रत्यक्ष लक्ष्य करण्याची ही पहिलीच वेळ आहे. हा शेवटचा हल्ला असणार नाही.”

इराणच्या प्रत्युत्तरात्मक हल्ल्यांमुळे अनेक महत्त्वाची ठिकाणे, निवासी परिसर आणि आखाती देशांमधील बंदरांचे नुकसान झाले आहे.