AI चा भयानक वापर! ७ मिनिटांत १५ कोटींच्या बिटकॉइनची चोरी; क्रिप्टोकरन्सी मार्केट हादरले

याबाबत शेअर केल्या जाणाऱ्या अनेक घटनांपैकी एक महत्त्वाची घटना म्हणजे कॅनेडियन उद्योजक जोनाथन गुडमन यांची. त्यांनी सांगितले की, त्यांचे १८.२५२४५०४३ बिटकॉइन्स चोरीला गेले आहेत. ३ ऑगस्ट २०२६ रोजीच्या दरांनुसार याचे मूल्य अंदाजे १.६ दशलक्ष डॉलर्स किंवा सुमारे १५ कोटी रुपये इतके होते.

एक्सवरील एका पोस्टमध्ये, गुडमन यांनी सांगितले की, त्याचा विश्वास होता की त्याची मालमत्ता सुरक्षित आहे कारण ती कोल्ड स्टोरेजमध्ये ठेवली होती. कोल्ड स्टोरेज ही एक अशी पद्धत आहे ज्यात प्रायव्हेट की तयार केल्या जातात आणि हार्डवेअर वॉलेटवर ऑफलाइन ठेवल्या जातात. त्यांच्या म्हणण्यानुसार, कोल्डकार्ड डिव्हाइस एका सेफ्टी डिपॉझिट बॉक्समध्ये ठेवले होते, तर बॅकअप माहिती वेगळी सुरक्षित ठेवली होती. त्यांनी सांगितले की हार्डवेअर वॉलेट किंवा सीड फ्रेज यांपैकी काहीही कधीही हॅक झाले नव्हते. पण जेव्हा त्यांना या त्रुटीबद्दल कळले, तेव्हा त्यांनी आपले वॉलेट तपासले आणि त्यांच्या बिटकॉइन्सची चोरी झाल्याचे समजले.

गुडमन यांनी सांगितले की, व्यवहारांच्या नोंदींवरून असे दिसून आले की, २९ जुलै रोजी रात्री ९:३६ ते ९:४३ च्या दरम्यान त्यांचे सर्व बिटकॉइन हस्तांतरित झाले होते, ज्यामुळे सात मिनिटांपेक्षा कमी वेळात त्याच्या नियंत्रणाखालील प्रत्येक वॉलेट रिकामे झाले.

एआयच्या मदतीने ब्रूट-फोर्स तंत्रांचा वापर

एक्सवरील एका पोस्टमध्ये त्यांनी आरोप केला की, हल्लेखोरांनी काही ‘कोल्डकार्ड’ उपकरणांवरील सीड फ्रेजेस तयार करणाऱ्या कोडमधील एका त्रुटीचा गैरफायदा घेतला. त्यांच्या म्हणण्यानुसार, २०२१ मध्ये समाविष्ट करण्यात आलेल्या कोडमधील या त्रुटीमुळे हॅकर्सना आर्टिफिशियल इंटेलिजन्सच्या (AI) मदतीने ब्रूट-फोर्स तंत्रांचा वापर करून वॉलेटच्या सीड फ्रेजेस मिळवणे शक्य झाले.

या बिटकॉइन चोरीच्या कथित प्रकारामुळे रेडीटवरील अनेक युजर्सनी आपलेही असेच अनुभव मांडले आहेत. त्यांनी दावा केला आहे की, कोल्डकार्ड वॉलेटमध्ये ठेवलेले त्यांचे बिटकॉइन गमावले गेले आहेत.