तंत्रज्ञान क्षेत्रात क्रांती! मानवांसाठी नव्हे, तर ‘एआय एजंट’साठी तयार केला जगातील पहिला सीपीयू

पारंपारिक प्रोसेसरपेक्षा १.८ पट वेगवान

‘VERA’ ची रचना ही एआय एजंट्सच्या युगाचा विचार करून करण्यात आली आहे. पारंपारिक x86 प्रोसेसरच्या तुलनेत हा सीपीयू १.८ पट अधिक वेगाने काम पूर्ण करतो, असे एनव्हिडियाचे संस्थापक आणि मुख्य कार्यकारी अधिकारी जेन्सन हुआंग यांनी सांगितले. ‘ओपनएआय’ (OpenAI), ‘अँथ्रॉपिक’ (Anthropic) आणि ‘स्पेसएक्सएआय’ (SpaceXAI) यांसारख्या जगातील सर्वात मोठ्या एआय कंपन्यांनी या सीपीयू सिस्टीमचा प्राथमिक टप्प्यातच स्वीकार केला आहे.

‘VERA’ ची तांत्रिक वैशिष्ट्ये:

मजबूत कोर रचना: हा प्रोसेसर एनव्हिडियाच्या कस्टमाइज्ड ‘ऑलिम्पस’ सीपीयू कोरवर आधारित असून यात ८८ कोअर्स देण्यात आले आहेत.

अतिवेगवान बँडविड्थ: यामध्ये ‘स्पेशिअल मल्टीथ्रेडिंग’ आणि LPDDR5X मेमरी सबसिस्टम आहे, जी प्रति सेकंद १.२ टेराबाइट (1.2TB/s) पर्यंतचा डेटा बँडविड्थ गती प्रदान करते.

एआय फॅक्टरीसाठी उपयुक्त: आधुनिक एआय कारखान्यांचा पाया असलेल्या पायथन रनटाईम्स (Python runtimes), सँडबॉक्स्ड कोड एक्झिक्युशन, ऑर्केस्ट्रेशन लॉजिक आणि अ‍ॅनालिटिक्स पाईपलाईन्स यांसारख्या जड कामांसाठी याची रचना करण्यात आली आहे.

कोण करणार वापर?

प्राथमिक ग्राहक: ओपनएआय, अँथ्रॉपिक आणि स्पेसएक्सएआय.
क्लाउड कंपन्या: बाइटडान्स (ByteDance), कोरवीव्ह (CoreWeave) आणि ओरॅकल क्लाउड इन्फ्रास्ट्रक्चर (Oracle Cloud Infrastructure) हे देखील लवकरच याचे डिप्लॉयमेंट करणार आहेत.

न्यूयॉर्क स्टॉक एक्सचेंज: दररोज १.१ ट्रिलियनहून अधिक संदेशांवर प्रक्रिया करणाऱ्या आपल्या पायाभूत सुविधांचा विस्तार करण्यासाठी न्यूयॉर्क स्टॉक एक्सचेंज देखील ‘VERA’ चा वापर करण्याच्या तयारीत आहे.

एनव्हिडियाच्या इकोसिस्टममधील भूमिका

हा प्रोसेसर एनव्हिडियाच्या संपूर्ण प्रणालीमध्ये तीन मुख्य भूमिका बजावेल:

१. स्वतंत्र ‘व्हेरा’ (Vera) सर्व्हरसाठी मुख्य सीपीयू म्हणून.
२. ‘एनव्हिडिया व्हेरा रुबिन जीपीयू’ प्लॅटफॉर्मसाठी होस्ट प्रोसेसर म्हणून.
३. ‘व्हेरा ब्लूफील्ड-४ एसटीएक्स एआय’ एआय स्टोरेज प्लॅटफॉर्मचा मुख्य मेंदू म्हणून.

कधी उपलब्ध होणार?

डेल टेक्नॉलॉजीज , एचपीई , लेनोवो आणि सुपरमायक्रो यांसारख्या आघाडीच्या कंपन्या या प्रोसेसरसह सर्व्हर तयार करणार आहेत. व्यावसायिक बाजारात आणि क्लाउड पार्टनर्सकडे हे व्हेरा सिस्टीम्स यंदाच्या शरद ऋतूपासून (Autumn 2026) उपलब्ध होणार आहेत.

एनव्हिडियाचे बाजारभांडवल ५ ट्रिलियन डॉलरवर

कृत्रिम बुद्धिमत्ता आणि सेमीकंडक्टर क्षेत्रातील जगातील आघाडीची तंत्रज्ञान कंपनी एनव्हिडियाच्या शेअर आणि बाजार भांडवलात सध्या अभूतपूर्व तेजी दिसून येत आहे. अमेरिकन शेअर बाजार ‘नॅसडॅक’वरील ताज्या आकडेवारीनुसार, एनव्हिडियाचा एक शेअर सध्या सुमारे $२११.१४ च्या पातळीवर व्यवहार करत असून गेल्या ५२ आठवड्यांत या शेअरने $२३६.५४ चा उच्चांक आणि $१३२.९२ चा नीचांक गाठला आहे.

या ऐतिहासिक तेजीमुळे एनव्हिडियाचे एकूण बाजार भांडवल तब्बल $५.११ ट्रिलियन (सुमारे ५,११० अब्ज डॉलर) वर पोहोचले आहे. या अवाढव्य मूल्यासह एनव्हिडिया ही मायक्रोसॉफ्ट आणि अ‍ॅपलसारख्या दिग्गज कंपन्यांच्या पंक्तीत जाऊन बसली असून, सेमीकंडक्टर आणि एआय चिप मेकिंग क्षेत्रात ती जगातील पहिल्या क्रमांकाची सर्वात मौल्यवान कंपनी बनली आहे. प्रगत जीपीयू (GPUs) आणि नुकताच सादर केलेला ‘VERA’ हा एआय-केंद्रित सीपीयू यांमुळे जगभरातील टेक कंपन्यांकडून एनव्हिडियाच्या उपकरणांना असलेली मागणी सातत्याने वाढत आहे, ज्याचा थेट फायदा कंपनीच्या बाजार मूल्याला होत आहे.