Samsung AI profit reaches record highs as global AI memory chips demand creates an unprecedented earnings boom: सॅमसंग इलेक्ट्रॉनिक्सने मंगळवारी जाहीर केले की त्यांच्या दुसऱ्या तिमाहीतील नफ्यात (Operating profit) १९ पटीने वाढ झाली आहे. ही वाढ गेल्या तीन वर्षांतील त्यांच्या एकूण कमाईपेक्षाही अधिक आहे. मात्र, ‘एआय’ तंत्रज्ञानावर आधारित चिप्सच्या मागणीमुळे आलेली ही तेजी भविष्यात किती काळ टिकेल, याबद्दलच्या चिंतेमुळे गुंतवणूकदारांनी कंपनीचे १०० अब्ज डॉलर्सहून अधिक किमतीचे शेअर्स विकले.
‘एआय’ डेटा सेंटर्सच्या सतत विस्तारणाऱ्या जाळ्यामुळे मेमरी चिप्सची प्रचंड मागणी निर्माण झाली आहे आणि चिप्सचे भाव विक्रमी पातळीवर पोहोचले आहेत. यामुळे जगातील सर्वात मोठ्या मेमरी चिप उत्पादक कंपनीच्या कामगिरीत मोठी सुधारणा झाली आहे.
सॅमसंगने एप्रिल-जून कालावधीतील आपला नफा ५८.४४ अब्ज अमेरिकन डॉलर्स इतका असल्याचा अंदाज वर्तवला आहे. कंपनीने मागील वर्षी याच कालावधीत ३.४ अब्ज अमेरिकन डॉलर्स इतका नफा नोंदवला होता. तसेच, कंपनीचा महसूल मागील वर्षाच्या तुलनेत १२९ टक्क्यांनी वाढून १२४ अब्ज अमेरिकन डॉलर्सवर जाण्याची शक्यता असल्याचेही त्यांनी नमूद केले.
सॅमसंगने या तिमाहीत इतका प्रचंड नफा कमावला असूनही, दक्षिण कोरियातील या दिग्गज तंत्रज्ञान कंपनीच्या शेअर्समध्ये १०.१% पर्यंत घसरण झाली, तर प्रतिस्पर्धी कंपनी एसके हायनिक्सचे शेअर्स १०.६% पर्यंत घसरले. यामुळे दक्षिण कोरियाच्या शेअर बाजारातील प्रमुख निर्देशांक कोस्पीमध्ये १०.९% ची घसरण झाली.
बाजाराच्या अति-महत्त्वाकांक्षी अपेक्षा आणि एआय डेटा सेंटर्सच्या उभारणीत अडथळे येऊ शकतात किंवा ती प्रक्रिया मंदावू शकते, यांसारख्या चिंतांमुळे गुंतवणूकदार या कंपन्यांचे शअर्स विकत असल्याचे विश्लेषकांनी नमूद केले.
“सॅमसंगची दमदार कमाई मोठ्या प्रमाणावर अपेक्षित होती आणि निकालांपूर्वी कंपनीच्या शेअर्समध्ये झालेल्या वाढीनंतर ती आधीच विचारात घेतली गेली होती. एआय क्षेत्रातील तेजीच्या शाश्वततेबद्दल आणि प्रमुख अमेरिकन तंत्रज्ञान कंपन्यांकडून एआय पायाभूत सुविधांवरील खर्च मंदावण्याच्या धोक्याबद्दल गुंतवणूकदार अजूनही चिंतित आहेत”, असे सॅमसंगच्या स्टॉकची मालकी असलेल्या पेट्रा कॅपिटल मॅनेजमेंटचे व्यवस्थापकीय भागीदार अल्बर्ट योंग म्हणाले.
भविष्यातील धोके
भविष्याचा विचार करता, विश्लेषकांच्या मते मेमरी क्षेत्रातील तेजीला सर्वात मोठा धोका एआय पायाभूत सुविधांमधील गुंतवणुकीतील मंदी हा असेल. गुंतवणूकदारांनी अशीही चिंता व्यक्त केली आहे की, मोठ्या तंत्रज्ञान कंपन्यांना अनिश्चित परतावा देणाऱ्या एआय पायाभूत सुविधांसाठी मोठ्या प्रमाणात कर्ज घ्यावे लागेल, ज्यामुळे चिप्सची मागणीही कमी होऊ शकते.
ऐतिहासिकदृष्ट्या मेमरी क्षेत्रात तेजी-मंदीची चक्रे दिसून आली असली तरी, काही विश्लेषकांच्या मते सध्याची सातत्यपूर्ण वाढ अधिक रचनात्मक आहे, कारण एआयची मागणी उद्योगाच्या उत्पादन विस्तार क्षमतेपेक्षा जास्त आहे. नवीन मेमरी फॅब्रिकेशन प्लांट्स उभारण्यासाठी अनेक वर्षे लागतात, ज्यामुळे हायपरस्केल कंपन्या एआयमधील गुंतवणूक वाढवत असल्या तरी पुरवठ्याच्या वाढीवर मर्यादा येतात.
