मुख्य आर्थिक सल्लागारांकडून मोदी सरकारला घरचा आहेर; अर्थव्यवस्था ४ ट्रिलियन डॉलरचा टप्पा ओलांडणार तरीही…

मुंबईत ‘सिक्युरिटायझेशन’वरील एका कार्यक्रमात बोलताना, त्यांनी वंचित घटकांसाठी छोट्या कर्ज पुरवठ्याच्या (मायक्रोफायनान्स) पात्रतेसाठी असलेल्या ३ लाख रुपये वार्षिक उत्पन्न मर्यादेच्या पद्धतीवर कडक शब्दांत टीका करताना, सरकारला धोरणांमध्ये बदल करण्याचा सल्ला दिला.अशा निश्चित संख्यात्मक मर्यादांबाबत त्यांनी नाराजी व्यक्त केली.

अर्थव्यवस्था १ ट्रिलियन डॉलरवरून, ४ ट्रिलियन डॉलरपेक्षा मोठी झाली असताना जुन्या मर्यादा कायम ठेवणे योग्य नाही. त्याऐवजी गुणोत्तराधारित निकष अधिक उपयुक्त ठरतील, असे त्यांनी सुचवले. प्राधान्य क्षेत्र कर्जवाटप धोरणाबाबत बोलताना त्यांनी बँकिंग क्षेत्राने या नियमांचे आभार मानले पाहिजेत, असे म्हटले.

या धोरणामुळे कर्जवाटपाचे प्रमाण मोठ्या जनघटकांपर्यंत विस्तारण्यास मदत झाली असल्याचे त्यांनी नमूद केले.पश्चिम आशियातील संघर्षामुळे जागतिक पातळीवर निर्माण झालेला ऊर्जा धक्का, चालू खात्यावरील तूट आणि व्यवहार तोल या समष्टी आर्थिक घटकांना हाताळणे हा सध्या सरकारच्या दृष्टीने सर्वात मोठा प्राधान्यक्रम आणि निकडीची गोष्ट बनल्याचेही नागेश्वरन यांनी यावेळी स्पष्ट केले.

वित्तीय क्षेत्राबाबत कोणतेही थेट धोरणात्मक संकेत देण्याचे टाळत त्यांनी वास्तविक अर्थव्यवस्थेच्या गतीशी जुळवून घेतले पाहिजे, असे सांगितले. यावेळी वर्ष २००८ च्या जागतिक आर्थिक संकटाचा त्यांनी उल्लेख केला. वायदे बाजारातील व्यवहारांवर अधिक भर दिला गेल्यामुळे हे संकट निर्माण झाले होते, असे त्यांनी स्पष्ट केले.

व्ही. अनंत नागेश्वरन कोण आहेत?

डॉ. व्ही. अनंत नागेश्वरन हे एक प्रसिद्ध अर्थतज्ज्ञ असून सध्या ते भारत सरकारचे मुख्य आर्थिक सल्लागार म्हणून कार्यरत आहेत. जानेवारी २०२२ मध्ये त्यांची या पदावर नियुक्ती करण्यात आली. त्यांनी अहमदाबादच्या नामांकित IIM (Indian Institute of Management) मधून मॅनेजमेंटमध्ये पदव्युत्तर पदविका (MBA) पूर्ण केली. त्यानंतर त्यांनी युनिव्हर्सिटी ऑफ मॅसॅच्युसेट्स (University of Massachusetts) मधून ‘एक्स्चेंज रेट’ (विनिमय दर) या विषयावर संशोधन करून अर्थशास्त्रात डॉक्टरेट (Ph.D.) पदवी मिळवली.

बँकिंग आणि वित्त क्षेत्र: त्यांनी स्वित्झर्लंड आणि सिंगापूरमधील अनेक आंतरराष्ट्रीय बँकांमध्ये (जसे की Credit Suisse आणि Julius Baer) मॅक्रोइकॉनॉमिक रिसर्च आणि इन्व्हेस्टमेंट स्ट्रेटेजीचे प्रमुख म्हणून काम केले आहे. सिंगापूर नॅशनल युनिव्हर्सिटी (NUS), क्रेनफिल्ड युनिव्हर्सिटी आणि भारतातील अनेक नामांकित संस्थांमध्ये अर्थशास्त्र आणि वित्त विषयांचे अध्यापन केले आहे.