Zaheer Khan: क्रिकेटमधील निवृत्तीनंतर झहीर खानने कसे उभारले औद्योगिक साम्राज्य? जाणून घ्या त्याची संपत्ती आणि व्यवसाय

क्रिकेटमधील निवृत्तीनंतर झहीरने समालोचन आणि प्रशिक्षणामध्ये आपली नवी कारकीर्द सुरू केली आहे. या सर्वांबरोबरच त्याने विविध व्यवसायांत गुंतवणूक करत एक औद्योगिक साम्राज्य उभे केले आहे.

वयाच्या २७ व्या वर्षी पुण्यात सुरू केले होते रेस्टॉरंट

वेगवान गोलंदाजांना माहीत असते की त्यांची कारकीर्द लवकर संपते. झहीरला ही गोष्ट इतरांपेक्षा अधिक चांगल्या प्रकारे माहीत होती. त्यामुळे २००५ मध्ये, भारतासाठी खेळत असतानाच, झहीरने पुण्यात ‘डाईन फाइन’ नावाचे रेस्टॉरंट सुरू केले. त्याचे हे रेस्टॉरंट चांगल्या मुघलाई जेवणासाठी आणि बिर्याणीसाठी प्रसिद्ध होते. दरम्यान, काही काळानंतर त्याने हे रेस्टॉरंट बंद केले.

यानंतर झहीरने ‘टॉस स्पोर्ट्स लाउंज’ आणि ‘फोयर बँक्वेट्स’ यांसारखी रेस्टॉरंट्सही सुरू केली. त्याच्या प्रत्येक रेस्टॉरंटचे खास वैशिष्ट्य होते. कौटुंबिक जेवणासाठी ‘डाईन फाइन’, क्रिकेटचा अनुभव घेऊ इच्छिणाऱ्या तरुण चाहत्यांसाठी ‘टॉस’, तर लग्न आणि कार्यक्रमांसाठी ‘फोयर बँक्वेट्स’.

वेदनांचे व्यवसायात रूपांतर

झहीरने त्याच्या आयुष्यातील बराचसा वेळ फिजिओथेरपीच्या टेबलावर घालवला आहे. त्याला शरीरातील प्रत्येक हाडाबद्दल आणि स्नायूबद्दल माहिती होती. त्याला हे माहीत होते की भारतीयांच्या फिटनेसची अवस्था अत्यंत वाईट आहे. त्यामुळेच त्याने २०१४ मध्ये त्याने ‘प्रोस्पोर्ट फिटनेस’ सुरू केले. येथे उपचार आणि पुनर्वसन कार्यक्रम चालतात. यासाठी त्याने भारतीय क्रिकेट संघाचे माजी फिजिओ अँड्र्यू लेपस यांना सोबत घेतले. ही तीच व्यक्ती होती, जिने अनेक वर्षे झहीरची कारकीर्द जिवंत ठेवली होती.

स्टेप्स मोजणारे ॲप

२०१८ पर्यंत प्रत्येकाकडे स्मार्टफोन आला होता. झहीरच्या लक्षात आले की लोक अधिक आळशी होत चालले आहेत. यामुळे त्याने ‘स्टेपसेटगो’ची स्थापना केली. हे ॲप तुमच्या स्टेप्स मोजते. तुम्ही जितके जास्त चालता, तितके तुम्हाला कॉईन्स मिळतात. त्या कॉईन्सचा वापर करून तुम्ही वस्तू खरेदी करू शकता.

यासाठी त्याने फक्त पोस्टर्सवर आपला चेहरा दाखवला नाही. तो बैठकींमध्ये बसायचा, डेटा पाहायचा आणि लोकांना सतत सक्रिय कसे ठेवायचे याचा अभ्यास करायचा. तो एका टेक संस्थापकासारखा विचार करत होता. कंपनीने निधी उभारला आणि हळूहळू तिचे मूल्यांकन वाढले.

उद्योगांसाठी तंत्रज्ञानाचा वापर

झहीरने अलिकडेच ‘मॅक्सक्सी’ या कंपनीत गुंतवणूक केली आहे. ही कंपनी खाजगी मैदानांचे तंत्रज्ञानाच्या मदतीने स्मार्ट मैदानांमध्ये रूपांतर करते. झहीर क्रिप्टो आणि विकेंद्रित वित्तपुरवठ्याचाही अभ्यास करतो. इतर निवृत्त खेळाडू रिऍलिटी शो करत असताना, झहीर सोलाना ब्लॉकचेनबद्दल अभ्यास करत होता.

अनेक कंपन्यांमध्ये गुंतवणूक

कॉर्पोरेट नोंदींनुसार, झहीर फिटनेस, मीडिया आणि कन्सल्टिंग क्षेत्रांतील अनेक कंपन्यांशी संबंधित आहे. त्यापैकी काही कंपन्या आता बंद झाल्या आहेत. Z34 एनर्जी चालली नाही. स्पेला स्पोर्ट्स बंद पडली. अपयश आले तरी तो खचला नाही. त्याने इतर कंपन्यांच्या माध्यमातून आपला व्यावसायिक प्रवास सुरूच ठेवला आहे.

झहीर खानची एकूण संपत्ती

विविध सूत्रांनुसार झहीर खानची संपत्ती २०९ कोटी रुपये ते २४१ कोटी रुपयांच्या दरम्यान आहे. हे आकडे सार्वजनिकरित्या उपलब्ध असलेल्या माहितीवर आधारित आहेत.

झहीरने आयपीएलच्या दहा हंगामांतून ३० कोटी रुपयांपेक्षा जास्त कमाई केली होती. तो लखनौ सुपर जायंट्स संघाचा मार्गदर्शक होता. त्याचे मानधन सार्वजनिक नाही, मात्र आयपीएलमधील मार्गदर्शक पदांसाठी चांगले मानधन दिले जाते. तो मुंबई इंडियन्ससोबत क्रिकेट संबंधित विविध कामातही सहभागी आहे.

झहीरला नायके, पेप्सी आणि स्टार स्पोर्ट्सकडून जाहिराती मिळतात. त्याची पत्नी सागरिका घाटगे अभिनेत्री आहे. ते दोघे मिळून लक्झरी ब्रँडच्या जाहिराती करतात.

२०२१ मध्ये त्याने पुण्यातील सेनापती बापट मार्गावर ११.५ कोटी रुपयांना एक डुप्लेक्स फ्लॅट खरेदी केला आहे. अशा शहरात केलेली ही एक हुशार गुंतवणूक आहे, जिथे मालमत्तेच्या किमती कधीही कमी होत नाहीत. त्याच्याकडे जर्मन आणि जपानी गाड्यांचा संग्रह आहे. यामध्ये बीएमडब्ल्यू ५ सिरीज, मर्सिडीज एस-क्लास, ऑडी ए८, टोयोटा फॉर्च्युनर आणि होंडा अकॉर्ड यांचा समावेश आहे.