Success Story: आयुष्यात प्रत्येक व्यक्ती आपल्या स्वप्नपूर्तीसाठी जगत असते, पण प्रत्येक व्यक्ती स्वप्न पूर्ण करेलच असं नाही. काही जण अथक प्रयत्न करून जिद्दीनं आपलं स्वप्न साकारण्यात यशस्वी होतात. स्वप्न पूर्ण करण्यासाठी वय, परिस्थिती पाहिली जात नाही. आज आम्ही अशाच एका व्यक्तीचा प्रेरणादायी प्रवास सांगणार आहोत, ज्यांनी गरीब परिस्थितीतून आपलं स्वप्न पूर्ण केलं. सोलापूर येथील IAS रमेश घोलप हे एका गरीब कुटुंबातील असून त्यांच्या कुटुंबाचा बांगड्या विकण्याचा व्यवसाय होता. परंतु, अनेक संकटांवर मात करून त्यांनी भारतातील सर्वात कठीण परीक्षांपैकी एक UPSC उत्तीर्ण केली आणि AIR २८७ मिळवले.
रमेश घोलप यांचे बालपण
IAS रमेश घोलप यांचा जन्म महाराष्ट्रातील सोलापूर जिल्ह्यातील एका छोट्या गावात झाला. त्यांचे वडील गोरख घोलप सायकल दुरुस्त करायचे. पण, एके दिवशी मद्यपानाच्या व्यसनामुळे त्यांची तब्येत बिघडली आणि रमेश लहान असताना त्यांच्या वडिलांचे निधन झाले. वडिलांच्या निधनानंतर रमेश यांच्या आईने कुटुंबाचा उदरनिर्वाह करण्यासाठी आजूबाजूच्या गावात बांगड्या विकायला सुरुवात केली. बांगड्या विकण्यासाठी रमेश देखील आईची मदत करू लागले. प्रतिकूल परिस्थिती असूनही रमेश यांना नेहमी जास्त शिक्षण घेण्याची इच्छा होती. ते पुढचे शिक्षण घेण्यासाठी आपल्या काकांसह बार्शीला गेले.
रमेश अभ्यासात टॉपर होते, पण आर्थिक अडचणींमुळे त्यांना बीएडचा डिप्लोमा घ्यावा लागला. २००९ मध्ये त्यांनी एका शाळेत शिक्षकाची नोकरी स्वीकारली. यावेळी तहसीलदारांशी झालेल्या संवादामुळे त्यांना आयएएस होण्याची प्रेरणा मिळाली. जिद्द आणि आईच्या पाठिंब्याने त्यांनी नोकरी सोडली आणि यूपीएससीची तयारी सुरू केली.
कोचिंगशिवाय मिळवले यश
प्रतिकूल परिस्थितीमुळे रमेश यांनी कोणत्याही कोचिंगशिवाय UPSC ची तयारी सुरू केली. परंतु, ते पहिल्या प्रयत्नात अयशस्वी झाले; तरी त्यांनी हार मानली नाही. २०१२ मध्ये त्यांनी UPSC परीक्षा २८७ व्या क्रमांकासह उत्तीर्ण केली आणि IAS बनले.
