बंगला, अपार्टमेंट अगदी शाळा, कंपनी अशा सार्वजनिक ठिकाणी उपलब्ध असलेल्या जमिनीवरही उत्तम बाग फुलवता येते. वास्तूच्या सौंदर्याचा, वाहतुकीचा, वापराविषयीच्या जागेचा विचार करून ही बाग फुलवता येते.
विशेष म्हणजे येथे जमिनीवरच बाग करायची असल्याने बऱ्याच प्रमाणात बाग फुलवण्यास अनुकूलता असते. भाजीपाल्याचीही बाग तर डोळ्यांची पारणे फिटतील अशी फुलते. जागा मोठी असल्यास ५ बाय ५ फुटांचे चौकोन करता येतात किंवा कंपाउंडलगत २ फूट जागा सोडून तेथे लांबलचक वाफे तयार करता येतात. आपल्याला त्याचा उपयोग तात्पुरता आहे की कायम स्वरूपाचा याचा विचार करून त्यात आर्थिक गुंतवणूक करता येते. मोठी झाडे निवडताना त्यांचा पसरणाऱ्या फांद्यांचा डोलारा (कॅनोपी) मुळांचा पसारा, पानांची गळती, मुळांचा व खोडाचा वास्तूला होणारा धोका लक्षात घेऊन झाडांची निवड करावी.
भाजीपाला व फुलबागेसाठी वाफे तयार करताना, त्यात फिरायला मोकळी जागा ठेवल्यास चांगली सोय होईल. येणाऱ्या सूर्यप्रकाशाची खातरजमा करून फुलझाडांची व पालेभाज्या, फळभाज्या यांची निवड करावी. येथे कल्पकतेने लोखंडी पायरीच्या मांडणीचा विचार केल्या, बागेची मांडणी अधिक देखणी होईल.
संदीप चव्हाण