वाचक पत्र : महिलांनो जाग्या व्हा…!

‘पंचसूत्री: भोंदू प्रतिकाराची’ (२५ एप्रिल) हा ॲड.रंजना पवार गवांदे यांचा लेख वाचला. ‘अंनिस’च्या कार्यकर्त्या म्हणून त्यांचा अनुभव दांडगा आहेच आणि अनेक लेखांमधून त्या सामाजिक मानसिकता बदलण्यासाठी अनेक उदाहरणांसह प्रभावी मांडणी करत असतात. स्त्रियांना सहआरोपी करण्यात येऊ नये. अनेक कारणांमुळे ती विरोध करण्यास घाबरते. त्यामुळे एकंदर समाजाची मानसिकता बदलून वैज्ञानिक दृष्टिकोन, चिकित्सक बुद्धी, अनिष्ट प्रथा-परंपरांना नकार, दैववादाचा अस्वीकार आणि जादूटोणाविरोधी कायदा अंमलबजावणी ही पंचसूत्री परिणामकारक ठरेल, असे स्पष्ट विचार त्यांनी मांडले आहेत. पूर्वीच्या नराधमांची उदाहरणे असताना सुशिक्षित तरुणी, लग्न झालेल्या व न झालेल्या बायका, गर्भवती या बुवांकडे संमोहित होऊन जातातच कशा? कोप होईल, शाप मिळेल, नवरा मरेल, व्हिडीओ होईल म्हणून तक्रार करण्यास घाबरतात? भगिनींना कळकळीची विनंती. फक्त महिला दिन साजरे करू नका. सुशिक्षित, सुसंस्कृत राहून डोळे उघडे ठेवा. एकत्र या आणि अशा भोंदूंचे बुरखे फाडा. इतरांनाही सावध करा.-डॉ. अनुपमा साळगांवकर-नेरुरकर